देवरुखमध्ये रविवारी
विद्यार्थी गुणगौरव कार्यक्रम

साडवली ः कुणबी समाजोन्नती संघ, कुणबी सहकारी पतपेढी व कुणबी शिक्षण प्रसारक मंडळ यांच्या संयुक्त विद्यमाने तालुक्यातील दहावी, बारावी, पदवीधर, शिष्यवृत्तीधारक व इतर प्रावीण्य विद्यार्थ्यांसह विविध क्षेत्रात चांगली कामगिरी करणाऱ्या व्यक्तींचा गौरव ६ नोव्हेंबरला सकाळी ठीक १०.३० वा. देवरूख येथील कुणबी भवनात आयोजित केला आहे. या कार्यक्रमाचे नियोजन नुकत्याच झालेल्या बैठकीत करण्यात आले. या वेळी संगमेश्वर तालुकाध्यक्ष शरदचंद्र गीते, उपाध्यक्ष बाळकृष्ण काष्टे, संजय नाखरेकर, सचिव प्रवीण टक्के, खजिनदार विष्णू आमकर, कृष्णा हरेकर, संदीप धावडे, नितीन लोकम, दीपिका जोशी, संतोष चांदे, नारायण सुर्वे यांच्यासह अन्य पदाधिकारी उपस्थित होते.
-----
आठल्ये महाविद्यालयात
विद्यार्थी-पालकसभा

देवरूख ः देवरूख शिक्षण प्रसारक मंडळाच्या आठल्ये-सप्रे-पित्रे कनिष्ठ महाविद्यालयात विद्यार्थी-पालकसभेचे आयोजन करण्यात आले होते. विद्यार्थी व पालकांशी सहजपणे संवाद साधता यावा यासाठी दोन दिवस ही सभा घेण्यात आली. विविध शाखेतील बारावीतील विद्यार्थ्यांची उपस्थिती व शैक्षणिक प्रगती या प्रमुख विषयांवर आधारित ही सभा झाली. या सभेचे सूत्रसंचालन प्रा. विजय मुंडेकर आणि प्रा. प्रवीण जोशी यांनी केले. सभेचे प्रास्ताविक कनिष्ठ महाविद्यालयाचे पर्यवेक्षक प्रा. एम. आर. लुंगसे यांनी केले. प्रा. लुंगसे यांनी सभा आयोजनाचा उद्देश, विद्यार्थी व पालक यांच्याकडून विद्यार्थ्यांच्या शैक्षणिक प्रगतीच्यादृष्टीने असणाऱ्या अपेक्षा, पालकांनी विद्यार्थ्यांबाबत घ्यावयाची काळजी व दक्षता याबाबत सविस्तर माहिती दिली. या सभेच्या आयोजनासाठी प्राचार्य डॉ. नरेंद्र तेंडोलकर यांनी शिक्षकांचे कौतुक केले.