-ratchl221.jpg-
24N20596
चिपळूण ः पोलिस निरीक्षकांना निवेदन देताना काँग्रेसचे पदाधिकारी.
----------------

‘त्या’ कंपनीवर गुन्हा दाखल करा

चिपळुणातील अपघात ; महिलेचा उपचाराचा खर्चही करावा

चिपळूण, ता. २२ ः शहरातून जाणाऱ्या राष्ट्रीय महामार्गावर विंध्यवासिनी रोडजवळ ट्रेलर ट्रक व दुचाकीचा अपघात होऊन महिला गंभीर जखमी झाली. या अपघातप्रकरणी चिपळूण पोलिस ठाण्यात गुन्हा नोंद झाला आहे; मात्र या अपघातास राष्ट्रीय महामार्गाचे काम करणारी कंपनी जबाबदार असून तिच्यावर गुन्हा दाखल करावा, अशी मागणी काँग्रेस पदाधिकाऱ्यांनी पोलिस निरीक्षकांना निवेदन देत केली आहे.
येथील राष्ट्रीय काँग्रेसचे तालुकाध्यक्ष लियाकत शाह व पदाधिकाऱ्यांनी निवेदन दिले आहे. शहरातून जाणाऱ्या राष्ट्रीय महामार्गाच्या सर्व्हिस रोडवर साईडपट्टी न सोडता लावलेल्या बॅरिकेटमुळे येथे रस्ता अरूंद झाला आहे तसेच रस्त्यावर वाळूचे बारीक कण असल्यामुळे दुचाकी घसरण्याचे प्रमाण वाढत आहे. याबाबत वारंवार राष्ट्रीय महामार्गाचे काम करणाऱ्या संबधित कंपनी व्यवस्थापकांना कळवून देखील त्यांनी चुकीच्या पद्धतीने बॅरिकेटस लावल्याने हा अपघात झाला. या घटनेचे गांभीर्य पाहता संबधित कंपनी व त्यांचे व्यवस्थापक यांच्यावर गुन्हा दाखल करण्यात यावा. यापुढे जखमी महिलेच्या उपचारासाठीचा सर्व खर्च कंपनी व्यवस्थापकांनी करावा, अशी मागणीही काँग्रेस पदाधिकाऱ्यांनी केली आहे.