नाचणे, गणेश कॉलनीत भरदिवसा घरफोड्या
४ लाख ४१ हजार ९०० रुपयांचा ऐवज पळविला ः चोरट्याविरुद्ध गुन्हा
सकाळ वृत्तसेवा
रत्नागिरी, ता. २४ ः शहरातील गणेश कॉलनी येथे चोरट्याने भरदिवसा घरफोडी करून ४ लाख ४१ हजार ९०० रुपयांसह दागिन्यांवर डल्ला मारला. मतमोजणीच्या जल्लोषाचा फायदा घेऊन चोरट्याने श्रीरामनगर आणि गणेश कॉलनी येथे डल्ला मारला. शहर पोलिस ठाण्यात चोरट्याविरुद्ध गुन्हा दाखल केला आहे. ही घटना शनिवारी (ता. २३) दुपारी दोन ते चार या कालवधीत फिर्यादी राहत असलेल्या श्रीरामनगर-नाचणे व गणेश कॉलनी येथे घडली.
पोलिसांकडून मिळालेल्या माहितीनुसार फिर्यादी महिला राहत असलेल्या श्रीरामनगर-नाचणे येथून दुपारी दोन ते चार या वेळात घरात कुणीही नसल्याचा फायदा घेऊन चोरट्याने दरवाजाच्या कडीकोयंडा उचकटून ३ लाख ५९ हजार ४०० रुपयांवर डल्ला मारला. त्यानंतर गणेश कॉलनी येथील नागेश गजबार यांच्या घरातील ८२ हजार ९०० रुपये, यामध्ये प्लास्टिकच्या डब्यात ठेवलेले २५ हजार, ३ हजार ५०० रुपये मुलांच्या पिगी बॅंकमधील, कपाटातील १४ हजार ९०० रुपये, १ लाख २२ हजार ५०० रुपयांचे मंगळसूत्र, ७० हजारांचा सोन्याचा हार, २१ हजारांची ठुशी, ५२ हजार ५०० रुपयांची सोन्याची चेन, १७ हजार ५०० रुपयांची सोन्याची चेन, ७० हजार रुपयांच्या कपाटाच्या लॉकरमध्ये ठेवलेल्या नोटा आणि १२ हजार ५०० रुपयांचे कानातील पट्ट्या असा एकूण ४ लाख ४१ हजार ९०० रुपयांचा मुद्देमाल चोरट्यांनी लांबवला. चोरटा नागरिकांच्या नजरेस पडला आहे. त्याचे वय अंदाजे ३० आहे. रंग सावळा, चेहरा उभा, दाढी-मिशी आहे. काळ्या रंगाचा फुल टी शर्ट व डोक्यात टीशर्टची टोपी आहे. राखाडी रंगाची जिन्स त्याने पॅन्ट व काळ्या रंगाचे चप्पल आहे. याप्रकरणी फिर्यादी महिलेने शहर पोलिस ठाण्यात तक्रार दिली आहे. तक्रारीवरून शहर पोलिसांनी तपासाची चक्रे फिरविली आहे. वर्णनावरून त्याचा शोध घेतला जात आहे. अधिक तपास शहर पोलिस अंमलदार करत आहेत.