56080

कुडाळात गुरुवारी कला, क्रीडा स्पर्धा

खासदार नारायण राणेंच्या वाढदिवसाचे निमित्त

सकाळ वृत्तसेवा
कुडाळ, ता. ७ ः महाराष्ट्र राज्याचे माजी मुख्यमंत्री, माजी केंद्रीय मंत्री, खासदार नारायण राणे यांच्या १० एप्रिलला होणाऱ्या वाढदिवसानिमित्त तालुक्यात विविध कला, क्रीडा, सांस्कृतिक व समाजोपयोगी कार्यक्रमांचे प्रत्येक जिल्हा परिषद गटात आयोजन केले आहे. हा वाढदिवस उत्साहात साजरा करण्यात येणार आहे.
कुडाळमध्ये पालकमंत्री नीतेश राणे, कुडाळ-मालवणचे आमदार नीलेश राणे, भाजप जिल्हाध्यक्ष प्रभाकर सावंत, शिवसेना जिल्हाध्यक्ष दत्ता सामंत यांच्या मार्गदर्शनाखाली राज्यस्तरीय खुली रॅपिड बुद्धिबळ स्पर्धा तसेच सिंधुदुर्ग जिल्ह्यातील पहिली जिल्हास्तरीय सुपर सिक्स चॅलेंजर कॅरम स्पर्धा आयोजित केली आहे. राज्यस्तरीय खुल्या बु‌द्धिबळ स्पर्धेत एकूण ३०० स्पर्धक सहभागी होतील. प्रथम पाच विजेत्यांना रोख बक्षिसे व आकर्षक चषक तसेच पहिल्या ५० स्पर्धकांना रोख रक्कमेची बक्षिसे व मेडल्स देण्यात येणार आहेत. सहभागी सर्व खेळाडूंना आकर्षक टी-शर्ट आणि प्रमाणपत्र प्रदान करण्यात येणार आहेत. याशिवाय ७ वर्षे ते १७ वर्षे वयोगटातील मुले व मुलींसाठी इतर उत्तेजनार्थ बक्षिसे ठेवण्यात आली आहेत. स्पर्धेसाठी मुख्य ऑरबिटर म्हणून संजय कवळेकर (इंटर नॅशनल ऑरबिटर) काम पाहतील. सिंधुदुर्ग जिल्हा डिस्ट्रिक्ट कॅरम असोसिएशनच्या मान्यतेने सिंधुदुर्ग जिल्ह्यातील पहिली सुपर सिक्स चॅलेंजर कॅरम स्पर्धेचे आयोजन केले आहे. कॅरम स्पर्धेत एकूण १०० पेक्षा जास्त खेळाडू सहभागी होतील. या स्पर्धेतील पहिल्या चार क्रमांकांसाठी रोख रक्कम व चषक तसेच उत्तेजनार्थ बक्षिसे ठेवली आहेत. सिंधुदुर्ग व गोवा येथील नामवंत पंच स्पर्धेसाठी उपलब्ध असतील. स्पर्धेचे मॉनिटरिंग डिस्ट्रिक्ट असोसिएशचे योगेश फणसळकर करणार आहेत. बु‌द्धिबळ व कॅरम या दोन्ही स्पर्धा वासुदेवानंद संकुल, उद्यमनगर कुडाळ, हॉल क्र. १ व २ येथे १० एप्रिलला सकाळी ८ ते सायंकाळी ५.३० पर्यंत होतील. बु‌द्धिबळ स्पर्धेसाठी श्रीकृष्ण आडेलकर, कॅरम स्पर्धेसाठी योगेश फणसळकर यांच्याशी संपर्क साधावा, असे आवाहन केले आहे. तसेच १० एप्रिलला होणाऱ्या या क्रीडा महाकुंभासाठी स्पर्धक खेळाडू व क्रीडारसिकांनी मोठ्या संख्येने उपस्थित राहावे, असे आवाहन कुडाळ तालुकाध्यक्ष संजय वेंगुर्लेकर आणि युवा मोर्चा तालुकाध्यक्ष रुपेश कानडे यांनी केले आहे.