62342

बांद्यात मिरवणुकीने शिखरकलशाचे आगमन

सकाळ वृत्तसेवा
बांदा, ता. ७ ः बांदा लकरकोट येथे श्री दत्त महाराजांच्या नूतन मूर्तीचे नामस्मरणाच्या गजरात मंगलमय मिरवणुकीने सोमवारी (ता. ६) आगमन झाले. लकरकोट श्री दत्त मंदिर पुनर्प्रतिष्ठापना व कलशारोहण सोहळ्यास सोमवारी (ता. ५) प्रारंभ झाला असून उद्यापर्यंत (ता. ८) सलग चार दिवस विविध धार्मिक कार्यक्रमांचे आयोजन केले आहे.
सोमवारी बांदा कट्टाकॉर्नर येथून या मिरवणुकीला आरंभ झाला. श्री बांदेश्वर मंदिरमार्गे ही मिरवणूक लकरकोट येथे आली. श्री गणपती, श्री दत्तगुरू तसेच शिखरकलश हे सजविलेल्या रथात ठेवण्यात आले. त्यापुढे श्री दत्तनामाचा गजर व भजन करीत भाविक चालले होते. मंगल कलश घेऊन पारंपरिक वेशभूषा करून महिला मोठ्या संख्येने सहभागी झाल्या होत्या. मिरवणूक मंदिरात पोहोचताच वंदन करून मूर्ती व शिखरकलश धान्याधिवासात ठेवण्यात आले. मंगळवारी विविध धार्मिक विधी करून मूर्ती व कलश जलाधिवासात ठेवण्यात आले. उद्या (ता. ७) मूर्ती स्थापना होणार आहे.