सावंतवाडीत शनिवारी
विशेष संगीत मैफल
सावंतवाडी ः येथील चंद्रकांत घाटे मित्रमंडळ आणि सद्गुरू संगीत विद्यालयाच्या संयुक्त विद्यमाने ज्येष्ठ हार्मोनियम आणि ऑर्गन वादक पं. गोविंदराव पटवर्धन यांच्या जन्मशताब्दी वर्षानिमित्त विशेष संगीत मैफलीचे आयोजन केले आहे. हा कार्यक्रम शनिवारी (ता. १०) सायंकाळी ५.३० ते रात्री ९.३० या वेळेत प्रकाश गोठोस्कर मंगल कार्यालय भटवाडी येथे रंगणार आहे. या मैफलीत विविध संगीत प्रकारांची रसिकांना मेजवानी मिळणार आहे. कार्यक्रमाची सुरुवात एच. एच. सावंत यांच्या नांदी ऑर्गन वादनाने होईल. त्यानंतर सद्गुरू संगीत विद्यालयाचे विद्यार्थी समूह हार्मोनियम वादन सादर करतील. चंद्रकांत घाटे यांचे सोलो हार्मोनियम वादन होईल. नीलेश मेस्त्री आणि मंगेश मेस्त्री यांची हार्मोनियम जुगलबंदी असणार आहे. या संगीत मैफलीत तबला साथ नीरज भोसले, सोहम मेस्त्री, ज्ञानेश नाईक व चैतन्य सुतार हे साथसंगत करणार आहेत. कार्यक्रमाचे निवेदन संजय कात्रे, गौरी घाटे करणार आहेत. संगीतप्रेमींनी या कार्यक्रमाला उपस्थित राहावे, असे आवाहन चंद्रकांत घाटे मित्रमंडळ आणि सद्गुरू संगीत विद्यालय, सावंतवाडी यांनी केले आहे.
---
वालावलला शनिवारी
आरोग्य चिकित्सा
कुडाळ ः मनोरमा महादेव चौधरी चॅरिटेबल ट्रस्ट, वालावल आणि एस.एस.पी.एम. लाईफटाईम हॉस्पिटल, पडवे यांच्या संयुक्त विद्यमाने मोफत आरोग्य तपासणी शिबिराचे आयोजन शनिवारी (ता. १०) सकाळी १० ते सायंकाळी ४ या वेळेत केले आहे. हे शिबिर मनोरमाई, वालावल येथे दयानंद चौधरी यांच्या निवासस्थानी होणार आहे. या शिबिरात हृदयरोग तपासणी, नेत्र तपासणी, युरोलॉजी तपासणी, अस्थिरोग तपासणी, जनरल सर्जरी, नेफ्रोलॉजी तपासणी, कर्करोग तपासणी, दंतरोग चिकित्सा, कान, नाक व घसा तपासणी, प्रसुतीशास्त्र आणि स्त्रीरोग तपासणी आदी तपासण्या मोफत करण्यात येणार आहेत. सर्वांनी या शिबिराचा लाभ घ्यावा. अधिक माहितीसाठी चिन्मय पाटकर, विकास लुडबे, विष्णू गोसावी यांच्याशी संपर्क साधावा. सर्व रुग्णांनी आपले जुने रिपोर्ट येताना सोबत घेऊन यावेत, असे आवाहन अध्यक्ष चौधरी यांनी केले आहे.