लोकमान्य टिळक स्मारक
करणार कदम यांचा गौरव
चिपळूण, ता. ७ ः येथील शतकोत्तर हीरकमहोत्सवी परंपरा लाभलेल्या लोकमान्य टिळक स्मारक वाचनमंदिराचे `सन्माननीय सदस्य` म्हणून माजी आमदार रमेश कदम यांना गौरवण्याचा निर्णय वाचनालयाने घेतला आहे. रविवारी (ता. ११) वाचनालयाच्या वस्तूसंग्रहालयाचे उद्‍घाटन पालकमंत्री उदय सामंत यांच्या हस्ते होणार आहे. या कार्यक्रमात कदम यांना गौरवण्यात येणार आहे.
चिपळूणला वैचारिक अधिष्ठान देणारे लोकमान्य टिळक स्मारक वाचनमंदिर आणि रमेश कदम यांचे अतूट नाते चार दशकांचे आहे. छत्तीस वर्षापूर्वी नगराध्यक्ष असताना १९८८ मध्ये संस्थेच्या यशवंतराव चव्हाण सभागृहाची निर्मिती झाली. यामध्ये कदम यांचे मोलाचे सहकार्य लाभले होते. वाचनालयाच्या अप्पासाहेब साठे सभागृह, उषाताई साठे सभागृह आणि बुरूमतळी भागातील विश्वरत्न डॉ. बाबासाहेब आंबेडकर वाचनालयासाठीही कदम यांनी केलेले सहकार्य मोलाचे आहे. स्मारकाच्या संचालक मंडळाने एकमताने घेतलेल्या सन्माननीय सदस्यत्व देण्याच्या निर्णयाला संमती दर्शवल्याबद्दल हा आमच्यासाठी आनंदाचा क्षण आहे, असे संचालक मंडळाने म्हटले आहे. लोकमान्य टिळक स्मारक परिवाराबद्दलची कदम यांची आपुलकी आणि सहकार्य असेच अखंड राहील, असा विश्वास वाचनालयाचे कार्यवाह विनायक ओक, कार्याध्यक्ष धनंजय चितळे, अध्यक्ष डॉ. यतीन जाधव यांनी व्यक्त केला आहे.