चंपक मैदानातील अनधिकृत बांधकामे हटवा
एमआयडीसीची नोटीस ; मिऱ्या -नागपूर कामात अडथळा
सकाळ वृत्तसेवा
रत्नागिरी, ता. १२ : शहराजवळील चंपक मैदानातील अनधिकृत बांधकामे हटवण्यासाठी महाराष्ट्र औद्योगिक विकास महामंडळाने नोटीस दिली आहे. मिऱ्या-नागपूर महामार्गासह टाटा स्किल सेंटरच्या कामात अडथळा येत असल्याने सातजणांना ही नोटीस बजावण्यात आली असून, १५ दिवसांत अतिक्रमण हटवण्याचा इशारा दिला आहे.
चंपक मैदानात ४० गुंठे जागा टाटा स्किल सेंटरसाठी दिली आहे. या ठिकाणी सुरू होत असलेल्या विकासकामांसाठी अतिक्रमण अडथळा ठरत असल्याने अशा बांधकामांवर कारवाई करण्याच्या सूचना दिल्या आहेत. ही नोटीस दिल्यानंतर १५ दिवसांच्या मुदतीत येथील अतिक्रमण न हटवल्यास एमआयडीसीकडून ती अतिक्रमणे हटवली जाणार आहेत तसेच त्यासाठी येणारा खर्च अतिक्रमणधारकांकडून वसूल करण्यात येईल, असे नोटिसीत नमूद केले आहे. अनेक वर्षांपूर्वी ती जागा स्टरलाइट कंपनीला देण्यात आली होती; मात्र स्थानिक विरोधामुळे कंपनी राज्याबाहेर निघून गेली. या जागेचा ताबा चंपक मैदान येथील जागा मिळवण्यासाठी एमआयडीसी आणि न्यायालयीन प्रक्रिया सुरू होती.
स्टरलाइट यांच्यात न्यायालयाच्या निकालानंतर ही जागा पुन्हा एमआयडीसीच्या ताब्यात आली. सध्या या जागेचा वापर टाटा स्किल सेंटरसाठी करण्यात येणार आहे. या केंद्राच्या कामाचे भूमीपूजनही केले आहे. तेथील अतिक्रमणामुळे विकासकामांमध्ये अडथळा निर्माण होत असल्यामुळे अतिक्रमण तातडीने हटवण्याची प्रक्रिया सुरू केली आहे. तेथील सहा गुंठे जागेत अतिक्रमण झाले आहे. त्यामुळे त्याला एमआयडीसीने नोटीस दिली आहे तसेच मिऱ्या-नागपूर महामार्गामध्येदेखील अऩेकांनी अतिक्रमण केले आहे. त्यांनाही एमआयडीसीने नोटीस दिली आहे.