-ratchl१३१.jpg-
२५N६३४६७
चिपळूण ः पुरस्काराचे वितरण करताना ज्येष्ठ कवी अरूण इंगवले.
------
काव्यमैफलीत चिपळूणचे रसिक चिंब!
काव्यप्रेमी शिक्षकमंचाचे आयोजन ः पुरस्कारांचेही वितरण
सकाळ वृत्तसेवा
चिपळूण, ता. १३ ः लोकमान्य टिळक स्मारक वाचनालयाच्या बाळशास्त्री जांभेकर सभागृहात सोलापूर येथील काव्यप्रेमी शिक्षकमंच या राज्यस्तरीय साहित्यिक संस्थेच्यावतीने रविवारी काव्यमैफलीचे आयोजन केले होते. गझल, कविता सादरीकरणाने कार्यक्रमाची रंगत अधिकच वाढली. चिपळूणचे रसिक या काव्यमैफलीत चिंब झाले. या निमित्ताने मराठी साहित्यक्षेत्रातील सर्वोत्कृष्ट साहित्यरचनांना काव्यप्रेमी साहित्य पुरस्कार तर काव्यप्रेमी परिवारातील सर्वोत्कृष्ट योगदानाकरिता काव्यप्रेमी प्रेरणा पुरस्कार देऊन गौरवण्यात आले.
काव्यप्रेमी शिक्षकमंचचे संस्थापक-अध्यक्ष आनंद घोडके यांच्या अध्यक्षतेखाली झालेल्या या सोहोळ्याप्रसंगी प्रमुख अतिथी म्हणून बोलताना चिपळूण येथील ज्येष्ठ कवी, नाटककार अरूण इंगवले यांनी साहित्यनिर्मिती करणाऱ्या शिक्षकांमुळेच समाजाचा विकास होतो आणि संस्कृतीची जपणूक उत्तम होते, असे गौरवोद्गार काढले. या वेळी भारतरत्न डॉ. बाबासाहेब आंबेडकर वाचनालय चिपळूणचे कार्याध्यक्ष सुनील खेडेकर, नाट्य परिषद चिपळूण शाखेचे उपाध्यक्ष योगेश बांडागळे, मराठी साहित्य परिषद चिपळूणचे अध्यक्ष प्रा. संतोष गोणबरे, निवेदक प्रकाश गांधी, कृषी अधिकारी चंद्रकांत कोळी, वाचन उपक्रमाचे कार्यवाह दिनेश देशमुख, गझलकार बबन धुमाळ, काव्यप्रेमीचे राज्य सचिव कालिदास चवडेकर आदी उपस्थित होते.
पुण्यातील डॉ. दाक्षायणी पंडित, किरण वेताळ, रश्मी गुजराथी, चिपळूणच्या नीला नातू, गारगोटीच्या डॉ. स्नेहल कुलकर्णी, मुलुंडच्या सीमा झुंजारराव, बेंगलोरचे अविनाश चिंचवडकर, डोंबिवलीतील सई बने, विजय जोशी, न्यूयॉर्कमधील नयना निगळ्ये, चेंबूरचे आनंद सांडू, सांगलीचे डॉ. दिनेश वाघुंबरे यांना काव्यप्रेमी साहित्य पुरस्काराने, तर ठाण्यातील मुकेश विशे, वर्ध्यातील कविता दाते, सांगलीचे गजानन पाटील, सिराज शिकलगार, अमरावतीचे प्रमोद भागवत, अश्विनी धाट-धाराशिव, गणेश खडके, सोलापूरचे श्रीमंत कोळी, पुण्यातील सौरभ नवले यांना काव्यप्रेमी प्रेरणा पुरस्काराने गौरवण्यात आले. विजय फडणीस यांना यंदाचा काव्यप्रेमी जीवनगौरव पुरस्कार देऊन त्यांचा सन्मान केला. ज्येष्ठ कवी अरूण इंगवले यांच्या हस्ते पुरस्कारांचे वितरण करण्यात आले.