- rat१४p२४.jpg-
P२५N६३७६३
राजापूर : नागरिकांकडून निवेदन स्वीकारताना मुख्य लिपिक जितेंद्र जाधव.
-----
धोपेश्वरघाटीत पाणी, रस्त्याची समस्या
राजापूर पालिकेवर नागरिकांची धडक : गढूळ पाण्यामुळे धोका
सकाळ वृत्तसेवा
राजापूर, ता. १५ ः शहरातील धोपेश्वरघाटी परिसरात राहणाऱ्या नागरिकांना भेडसावणाऱ्या पाणी, रस्ता व अन्य समस्यांच्या पार्श्वभूमीवर राजापूर नगर पालिकेवर धडक देत प्रशासनाला जाब विचारला. येथील नागरिकांना गढूळ पाणीपुरवठा केला जात असल्याने नागरिकांच्या आरोग्याला धोका निर्माण होण्याची शक्यता आहे. दिवसआड मिळणारे पाणीही सुरळीत येत नसल्याच्या तक्रारी नागरिकांनी केल्या. जवाहरचौक ते रानतळे रस्त्याच्या कामात त्रुटी असून गटाराचे काम निकृष्ट असल्याची तक्रार नागरिकांनी केली.
याबाबतचे निवेदन मुख्य लिपिक जितेंद्र जाधव यांना देण्यात आले. या वेळी माजी नगरसेवक नरेंद्र कोंबेकर, सौरभ खडपे यांच्यासह सुरेंद्र तांबे, सतीश तांबे, सहदेव पारकर, मजिद पाटणकर, अॅड. राहुल तांबे, विजय हिवाळकर, शीतल रहाटे, दिवाकर बोटले, मंदार बावधनकर, नीलेश रहाटे आदींसह नागरिक उपस्थित होते. या भागातील नागरिकांना ज्या साठवण टाकीतून पाणीपुरवठा होतो ती टाकी जीर्ण झाली असून टाकीवरील काही स्लॅबचा भाग हा मोडून टाकीमध्ये पडला आहे. तसेच टाकीची मागील बरेच वर्षे साफसफाई झाली नसल्यामुळे मोठ्या प्रमाणात मलबा साचलेला आहे. तेच पाणी नागरिकांना पुरवले जात आहे. त्यामुळे काही वेळेस गढूळ पाणी येत असून छोटे मासेदेखील येतात. जवाहरचौक ते रानतळे रस्त्याच्या डांबरीकरणाचे काम करण्यात आले. रस्त्यामध्ये काही ठिकाणी गटारे काढण्यात आली आहेत. गटारांवर बसवण्यात आलेली लोखंडी जाळी हलक्या प्रतीची असून, ती कधीही वाकू किंवा तुटू शकते. या मार्गावरून बुरंबेवाडीकडे जाणाऱ्या एसटी बसची नेहमी ये-जा असते तसा इतर अवजड वाहनेदेखील जा-ये करत असतात. त्यामुळे या रस्त्यावर हलक्या प्रतीची लोखंडी जाळी बसवल्यामुळे मोठा अपघात होण्याची दाट शक्यता आहे. पावसाचा विचार करता ड्रेनेजमधून पाणी वाहून जाईल की नाही, अशी शंका आहे.