महिलेचा ५३ हजारांच्या
ऐवजावर डल्ला
रत्नागिरी ः शहराजवळील शिरगाव-गांजुर्डा येथे घरात कुणीही नसल्याचा फायदा घेऊन अज्ञात महिलेने रोख रक्कमेसह ५३ हजार रुपयांच्या दागिन्यावर डल्ला मारला. शहर पोलिस ठाण्यात महिलेविरुद्ध गुन्हा दाखल करण्यात आला आहे. ही घटना ३ ते १२ मे रात्री साडेनऊच्या सुमारास गांजुर्डा मशिद येथे घडली. पोलिसांकडून मिळालेल्या माहितीनुसार, मोहिद्दीन अमीर हमजा सुंबड (वय ४२, रा. शिरगाव-गांजुर्डा मशिदीच्या मागे, रत्नागिरी) यांच्या घरात एका महिलेने घरात शिरून घरातील लोखंडी कपाट धारदार हत्याराने उचकटून कपाटातील ४० हजारांचा एक तोळ्याचा सोन्याचा नेकलेस व १३ हजार रोख रक्कम असा ५३ हजारांवर डल्ला मारला. या प्रकरणी मोहिद्दीन सुंबड यांनी शहर पोलिस ठाण्यात तक्रार दिली. तक्रारीवरून पोलिसांनी संशयित महिलेविरुद्ध गुन्हा दाखल केला आहे.
---
विषारी द्रव्य पिलेल्या
महिलेचा मृत्यू
रत्नागिरी ः विषारी द्रव्य पिलेल्या महिलेला उपचारासाठी जिल्हा शासकीय रुग्णालयात दाखल केले होते. अधिक उपचारासाठी सीपीआर कोल्हापूर येथे हलविण्यात आले होते. तेथील वैद्यकीय अधिकाऱ्यांनी तिला तपासून मृत घोषित केले. राखी अजय पवार (वय ४४, रा. नवलाई पावणाई मंदिरजवळ, तांबटआळी, रत्नागिरी) असे मृत महिलेचे नाव आहे. पोलिसांकडून मिळालेल्या माहितीनुसार, राखी पवार यांनी अज्ञात कारणातून विषारी द्रव्य पिले होते. त्यांना अस्वस्थ वाटू लागल्यामुळे उपचारासाठी जिल्हा रुग्णालयात दाखल केले होते. अधिक उपचारासाठी सीपीआर हॉस्पिटल कोल्हापूर येथे दाखल केले असता उपचारापूर्वीच तिला तेथील वैद्यकीय अधिकाऱ्यांनी तपासून मृत घोषित केले. शहर पोलिस ठाण्यात आकस्मिक मृत्यूची नोंद करण्यात आली आहे.
----
वृद्धाचा आकस्मिक मृत्यू
पावस ः आजाराने अशक्तपणा आलेल्या वृद्धाला उपचारासाठी जिल्हा शासकीय रुग्णालयात दाखल केले होते. उपचारादरम्यान त्यांचा मृत्यू झाला. अनंत रघुनाथ टेमकर (वय ६५, रा. नवानगरवाडी, पेठ पूर्णगड, रत्नागिरी) असे मृत वृद्धाचे नाव आहे. ही घटना मंगळवारी (ता. १३) घडली. पूर्णगड सागरी सुरक्षा पोलिस ठाण्यात आकस्मिक मृत्यूची नोंद करण्यात आली आहे.