64489

ग्रामविकास मंडळ चाकरमान्यांचा आधार

गोपाळ गावकर ः पारपोलीत रौप्य महोत्सवी सांगता सोहळा

सकाळ वृत्तसेवा
ओटवणे, ता. १७ ः पारपोली ग्रामविकास मंडळ चाकरमान्यांसाठी आधारवड ठरले असून मुंबईत राहूनही गावाच्या प्रेमापोटी शैक्षणिक, धार्मिक व सामाजिक कार्यात गेली २५ वर्षे योगदान देत आहे. मंडळाची ही सामाजिक बांधिलकी यापुढेही सुरू राहणार आहे. पारपोली ग्रामस्थांनी संघटित राहून गावाचा विकास साधावा, असे आवाहन पारपोली ग्रामविकास मंडळाचे सचिव गोपाळ गावकर यांनी केले.
मुंबई स्थित चाकरमान्यांच्या पारपोली ग्रामविकास मंडळाच्या पारपोली येथे आयोजित मंडळाच्या रौप्य महोत्सवी सांगता सोहळ्यात श्री. गावकर बोलत होते. व्यासपीठावर गावप्रमुख शिवराम परब, मंडळाचे अध्यक्ष गोविंद तेजम, खजिनदार रामचंद्र गावकर, उपखजिनदार सुनील तेजम, सहसचिव समीर परब, सल्लागार उदय गावकर, मंडळाचे चिटणीस विश्वनाथ गावकर, पांडुरंग गावकर, सदस्या गितांजली गावकर, रेश्मा बिर्जे आदी उपस्थित होते.
गोविंद तेजम यांनी गोपाळ गावकर यांच्या नेतृत्वाखाली मंडळाच्या २५ वर्षांतील कार्याचा आढावा घेतला. उपस्थित मान्यवरांनी चाकरमान्यांना संघटित करण्यासह मंडळाच्या २५ वर्षांच्या जडणघडणीत गोपाळ गावकर यांचे महत्त्वपूर्ण योगदान असल्याचे सांगत त्यांना त्यांच्या कुटुंबीयांसह सहकाऱ्यांची लाभलेली उत्तम साथ कौतुकास्पद असल्याचे सांगितले. मंडळाच्या माध्यमातून गावात राबवलेल्या अनेक उपक्रमांसह कार्याचे कौतुक केले. सावंतवाडीचे माजी नगराध्यक्ष संजू परब यांनी या कार्यक्रमास भेट देऊन मंडळाच्या कार्याचे कौतुक केले. मंडळाच्यावतीने संजू परब यांचा सत्कार करण्यात आला. यावेळी सावंतवाडीतील शुभम क्रिएशनचे शुभम धुरी, इन्सुली येथील श्रीदेवी माऊली दशावतार नाट्य मंडळाचे मालक सचिन पालव यांच्यासह विविध क्षेत्रातील मान्यवरांचा सन्मान केला.
यानिमित्त आयोजित ‘खेळ पैठणीचा’ कार्यक्रमातील विजेत्या केतकी अहिर, दीपिका गुरव, रेश्मा बिर्जे, शीतल बिर्जे, ममता गवस, रसिका गावडे यांना पैठणीची साडी देऊन सन्मानित करण्यात आले. शुभम धुरी यांनी सूत्रसंचालन केले. छत्रपती संभाजी महाराजांचा इतिहास सांगणारा ‘छावा’ चित्रपटाला रसिकांचा प्रतिसाद लाभला. या कार्यक्रमाला पारपोलीवासीयांसह मंडळाचे सदस्य व चाकरमानी उपस्थित होते. विश्वनाथ गावकर यांनी प्रास्ताविक केले. समीर परब यांनी सूत्रसंचालन केले. दत्तगुरू गुरव यांनी आभार मानले.