64902
वैभववाडीत पावसाळ्याच्या तोंडावर गटार काम
रस्ता चिखलमय; चालकांची गैरसोय; व्यापाऱ्यांचे नुकसान
सकाळ वृत्तसेवा
वैभववाडी, ता. १९ ः पावसाळा तोंडावर आला असताना वाभवे वैभववाडी नगरपंचायतीने कसलाही विचार न करता शहरातील पश्चिम बाजूच्या गटार कामाला सुरुवात केली आहे. त्यामुळे व्यापाऱ्यांमधून नाराजीचा सुर उमटत आहे. ऐन गर्दीच्यावेळी हे काम सुरू केल्यामुळे आश्चर्य व्यक्त करण्यात येत आहे.
तळेरे-कोल्हापूर महामार्गावरील शुक नदी ते शांती नदीपर्यंतच्या रस्ता काँक्रिटीकरणाचे काम आठ दिवसांपूर्वी सुरू करण्यात आले. हे काम सुरू झाल्यानंतर पाऊस सुरू झाल्यामुळे शहरात चिखलाचे साम्राज्य पसरले आहे. वैभववाडी ते सोनाळी आणि वैभववाडी ते कोकिसरे नारकरवाडी या मार्गावर प्रवास करताना वाहनचालकांना तारेवरची कसरत करावी लागत आहे. आठ दिवसांत सात ते आठ दुचाकीस्वार रस्त्यावरून घसरल्याची चर्चा आहे. एकीकडे महामार्ग प्रधिकरणने रस्ता खोदून वाहतुकीची कोंडी केलेली असतानाच आता वाभवे वैभववाडी नगरपंचायतीने शहरातील पश्चिम बाजूच्या गटाराचे काम रविवारपासून (ता. १८) सुरू केले आहे. बसस्थानक ते संभाजी चौक असा ५० ते ६० मीटरचे गटार अगदी रस्त्यांपासून केवळ पाच-सहा फुटावर खोदले आहे. रविवारी रात्री खोदकाम पूर्ण झाल्यानंतर जोरदार पाऊस झाला. त्यामुळे संपूर्ण रस्ता चिखलमय झाला होता. या प्रकारामुळे व्यापारी वर्गातून नाराजी व्यक्त केली जात आहे. सध्या मोठ्या प्रमाणात चाकरमानी आले आहेत. खरेदीसाठी शहरात रोज गर्दी होते. व्यापाऱ्यांच्या दृष्टीने हा कालावधीत खूप महत्त्वाचा असताना नगरपंचायतीने हे काम सुरू केल्यामुळे व्यापारी वर्गातून नाराजी व्यक्त केली जात आहे.
......................
उत्सवांवेळी कामांना सुरुवात
वाभवे वैभववाडी नगरपंचायतीने आतापर्यंत अनेकदा सण, उत्सव या कालावधीतच कामांना सुरुवात करून व्यापारी आणि ग्राहकांची कोंडी केली आहे. गेल्यावर्षी ऐन गणेशोत्सव काळात गटारांच्या कामाला सुरुवात केली आणि व्यापारी व ग्राहकांची मोठी गैरसोय केली. अनेक लोक गटारात पडले. काही जखमीही झाले. त्यानंतर उर्वरित गटाराचे काम दिवाळीचा सण आठ दिवसांवर असताना सुरू केले. आता मेमध्ये लोकांची गर्दी आहे. व्यापाराचे दिवस आहेत आणि पाऊस सुरू असताना पश्चिम बाजूचे गटार काम सुरू केले. त्यामुळे नगरपंचायतीचे धोरणच काय? असा प्रश्न विचारला जात आहे.
..................
कोट
शहरातील काही कामांची निविदा प्रकिया विलंबाने झाली. त्यामुळे ही कामे सुरू करण्यास काहीसा विलंब झाला; मात्र व्यापारी, ग्राहकांना त्रास होणार नाही, याची दक्षता घेऊन तातडीने ही कामे पूर्ण करून घेण्यात येईल.
- रणजित तावडे, बांधकाम सभापती, वाभवे वैभववाडी नगरपंचायत
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.