६५३७१

योजनांपासून वंचित महिलांपर्यत
अधिकाऱ्यांनी पोहचावेः निलेश राणे
ःकुडाळात उमेद महिला मेळावा
सकाळ वृत्तसेवा
कुडाळ, ता. २१ ः महिला वर्गांसाठी शेतीपूरक व बिगर शेतीची ज्या काही योजना आहेत, त्याचा लाभ हा तळागाळात पोचला पाहिजे. शासन दरबारी प्रस्ताव पाठवताना प्रस्तावांचा धबधबा असला पाहिजे. सर्वाधिक निधी आपल्या सिंधुदुर्ग जिल्ह्यात कसा येईल? यासाठी प्रशासनाने तत्पर राहिले पाहिजे. ग्रामीण भागातील ज्या महिला या योजनेमधून वंचित आहेत, त्यांना लाभ कसा देता येईल? यासाठी अधिकारी वर्ग ग्रामीण भागात पोचले पाहिजेत, असे प्रतिपादन आमदार निलेश राणे यांनी आज उमेद महिला मेळाव्यात केले.
महाराष्ट्र राज्य ग्रामीण जीवनोन्नती अभियान अंतर्गत महिलांच्यावतीने आज येथील वासुदेवानंद हॉलमध्ये उमेद महिला मेळावा आयोजित केला होता. याचे उद्घाटन आमदार निलेश राणे यांच्या हस्ते करण्यात आले. यावेळी दिप्ती पडते, दादा साईल, प्रफुल्ल वालावलकर, वैभव पवार, गणेश राठोड, निलेश तेडोलकर, राकेश कांदे, सोनाली चव्हाण, साधना माडये, श्रेया मोर्ये, सुनिधी सावंत, रोहिणी कुपेरकर, शबनम नाईक, प्राची दळवी, साक्षी गोसावी, उषा नेरुरकर, सोनाली सावंत, रंजना मेस्त्री, रेवती राणे आदी उपस्थित होते.
आमदार राणे म्हणाले, "महिलांच्या विविध योजनेसाठी येत असलेल्या निधीबाबत आर्थिक व्यवस्था नीट असली पाहिजे. तो निधी योग्यरित्या पोचतो की नाही याबाबत लक्ष ठेवणे हे अधिकारी वर्गासह आम्हा सर्वांचे काम आहे. ज्या प्रभाग संघात निधी पोचला नाही, त्या ठिकाणी पोचवावा लागेल.
दीपलक्ष्मी पडते यांनी महिलांना आर्थिकदृष्ट्या सक्षमीकरण करणे यासाठी दहा प्रकारची शेतीपूरक उपकरणे देण्यात आली असून महिलांच्या सर्वांगीण विकासासाठी शासन कटिबध्द आहे, असे सांगितले. प्रास्ताविकात साधना माडये यांनी केले. यावेळी हेमंत मेस्त्री, मनीषा कांबळी, सुप्रिया वालावलकर, ज्योस्ना जाधव, नितीन गावडे, रसिका राणे यांचा सत्कार करण्यात आला. निवेदन निलेश गुरव यांनी केले.

चौकट
दहा ग्रामसंघांना शेतीपूरक साहित्य
आमदार राणेंच्या हस्ते अवजार बँकमधून तालुक्यातील दहा ग्रामसंघांना ५० लाख रुपयांचे शेतीपूरक साहित्याचे यावेळी वितरण करण्यात आले. यामध्ये सावली ग्राम संघ साळगाव, आधार ग्रामसंघ ओरोस, प्रगती ग्राम संघ आंबेरी, महिला शक्ती ग्रामसंघ मांडकुली, प्रगती ग्रामसंघ कुसबे, स्वराज्य ग्रामसंघ पडवे, सावित्रीबाई ग्रामसंघ आंब्रड, वैष्णवी ग्राम संघ केरवडे क नारुर, हिरकणी ग्रामसंघ पिंगुळी, क्रांती ग्रामसंघ भडगाव यांचा समावेश आहे.