rat30p10.jpg-
67133
वीणा ब्रह्मदंडे
----------------
वीणा ब्रह्मदंडेंच्या अवयवदानातून सहा जणांना नवजीवन
दोन मूत्रपिंड (किडनी), डोळ्यांचे कॉर्निया, त्वचेचे दान : फेडरेशनच्या जनजागृतीला यश
सकाळ वृत्तसेवा
रत्नागिरी, ता. ३० : डोकेदुखी व चक्कर आल्यामुळे रत्नागिरीच्या चिरायू रुग्णालयात दाखल झालेल्या वीणा ब्रह्मदंडे (वय ५७, खारेपाटण) यांचे मेंदूतील तीव्र रक्तस्रावामुळे निधन झाले. परंतु न्युरोलॉजीस्ट डॉ. श्रीविजय फडके यांनी अवयवदानाची माहिती दिली व तत्काळ ब्रह्मदंडे कुटुंबियांनी त्याला संमती दिली. द फेडरेशन ऑफ ऑर्गन अँड बॉडी डोनेशनचे अध्यक्ष पुरुषोत्तम पवार व कार्यकर्त्यांच्या मेहनतीमुळे दोन मूत्रपिंड (किडनी), दोन्ही डोळ्यांचे कॉर्निया आणि त्वचा यशस्वीरित्या दान करण्यात आली.
वीणा ब्रह्मदंडे यांच्या मृत्यूनंतर पती राजेंद्र ब्रह्मदंडे आणि कुटुंबियांनी माणुसकी आणि धैर्य दाखवल्यामुळेच हे शक्य झाले व सहा जणांना हे अवयवदानाचा उपयोग झाला आहे. रत्नागिरीमध्ये अद्याप अवयव प्रत्यारोपणासाठी नोंदणीकृत रुग्णालय उपलब्ध नाही. त्यामुळे द फेडरेशन ऑफ ऑर्गन अँड बॉडी डोनेशन (मुंबई) अध्यक्ष पुरुषोत्तम पवार यांच्याशी त्वरित संपर्क साधण्यात आला. त्यांनी मुंबई व पुणे झेडटीसीसी समन्वयकांशी बोलून मेंदूमृत्यू नोंदणीसाठी अँप्निया चाचण्या आणि अधिकृत प्रक्रिया सुरू केली. त्यानंतर श्री. पवार यांच्या समन्वयाने आणि डॉ. फडके यांच्या स्वखर्चाने विशेष कार्डियाक ॲम्बुलन्सच्या साहाय्याने वीणा ब्रह्मदंडे यांना कोल्हापूरच्या अस्टर आधार हॉस्पिटलमध्ये हलवण्यात आले. तिथे दोन अँप्निया चाचण्यांनंतर अधिकृत मेंदूमृत्यू घोषित करण्यात आला. यानंतर दोन मूत्रपिंड (किडनी), दोन्ही डोळ्यांचे कॉर्निया आणि त्वचा यशस्वीरित्या दान करण्यात आली.
या प्रक्रियेकरिता अस्टर आधारचे डॉ. अमोल कोडोलीकर, डॉ. अभिजित गवळी, डॉ. अभिजित पाटील, डॉ. मन्सूर अली, समन्वयक अभिजित शिंगाडे आणि पुणे झेडटीसीसीच्या आरती गोखले यांनी सहभाग दिला. द फेडरेशन ऑफ ऑर्गन अँड बॉडी डोनेशनचे कोल्हापूर जिल्हा समन्वयक योगेश अग्रवाल, डॉ. हेमा चौधरी यांचेही मोलाचे सहकार्य लाभले.

चौकट १
यांना मिळाली नवसंजीवनी
ग्रीन कॉरिडॉरच्या साहाय्याने एक मूत्रपिंड पुण्यातील बाणेर येथील ज्युपिटर हॉस्पिटलमध्ये पोहोचवण्यात आले. या अवयवदानातून एंड स्टेज ऑर्गन फेल्युअर झालेल्या दोन रुग्णांना जीवनदान मिळाले. चार अंध रुग्णांना दृष्टी लाभली, भाजलेल्या रुग्णांना त्वचेचा लाभ मिळाला. त्वचा दानासाठी सांगलीतील रोटरी स्किन बँकेच्या (कै.) कलावती चिंतामण पटवर्धन स्किन बँक टीमने स्वतः कोल्हापूरला जाऊन त्वचा स्वीकारली.

कोट १
माझी पत्नी वीणा वीरांगना होती. ती जिवंतपणी समाजकार्यात लढा देत होती आणि आता ती इतरांना जीवन देण्यासाठी अमर होत आहे.
- राजेंद्र ब्रह्मदंडे.

कोट २
२०१७ मध्ये अवयवदान चळवळ जनजागृती पदयात्रा मुंबई ते गोवा या मार्गावर काढली होती. त्याचा फायदा आज होऊ लागला आहे. त्यावेळी अनेकांनी इकडे सुविधा कुठे आहे, याचा काय उपयोग असे प्रश्न विचारले होते. पण आज हॉस्पीटल्स व डॉक्टर्सही मदत करू लागले आहेत. या चळवळीतील कार्यकर्त्यांनी अशा डॉक्टरांना सहकार्य केले पाहिजे. अवयवदान करणाऱ्या कुटुंबीयांचे कौतुकच केले पाहिजे.
- पुरुषोत्तम पवार, अध्यक्ष, द फेडरेशन ऑफ ऑर्गन अँड बॉडी डोनेशन.