rat३१p५.jpg -
२५N६७२७७
राजापूर ः ग्रामस्थांसह महावितरणच्या अधिकाऱ्यांशी संवाद साधताना आमदार किरण सामंत.

अखंडित वीजपुरवठ्याचे नियोजन करा
आमदार किरण सामंत ः महावितरणला अहवाल बनवण्याच्या सूचना
सकाळ वृत्तसेवा
राजापूर, ता. ३१ ः मॉन्सूनपूर्व पावसामुळे अनेक भागात वीजपुरवठा खंडित होत आहे. भविष्यात राजापूर तालुक्यासह शहरात अखंडित वीजपुरवठा सुरू ठेवण्यासाठी आतापासून नियोजन करा, अशा सूचना वीज महावितरण विभागाला आमदार किरण सामंत यांनी दिल्या. त्यासाठी आवश्यक साधनसामग्री व करावयाच्या उपाययोजनांचा विस्तृत अहवाल सादर करण्यासही सांगितले.
राजापूर शहरासह ग्रामीण भागातील वीजपुरवठा मॉन्सूनपूर्व पावसातच कोलमडला आहे. अनेक भागात वारंवार वीजपुरवठा खंडित होत असून, महावितरणकडून योग्य माहिती दिली जात नसल्याच्या तक्रारी नागरिकांकडून केल्या जात आहेत. याबाबत भाजप युवा कार्यकर्ते अरविंद लांजेकर यांनी आमदार सामंत यांच्याशी चर्चा करून एका बैठकीचे आयोजन केले होते. त्यामध्ये राजापूर वीजवितरण संबंधित समस्या मार्गी लावण्याची मागणी अनेकांनी केली होती. या बैठकीत विभागनिहाय वीजवितरणसंबंधित समस्यांचा आढावा घेण्यात आला. धोकादायक वीजखांब बदलणे, ट्रान्स्फॉर्मर बदलणे, यांसह अन्य तक्रारी ग्रामस्थांनी मांडल्या. शहरातील भूमिगत वीजवाहिन्यांच्या रखडलेल्या कामासह या दर्जाहीन झालेल्या कामाचीही तक्रार या वेळी करण्यात आली. त्याबाबत योग्य ती कार्यवाही करण्याच्या सूचना वीजवितरण विभागाच्या अधिकाऱ्यांना करण्यात आल्या. या बैठकीला पोलिस निरीक्षक अमित यादव, भाजप जिल्हा सरचिटणीस रवींद्र नागरेकर, शिवसेना उपजिल्हाप्रमुख अशफाक हाजू, शिवसेना तालुकाप्रमुख दीपक नागले, राजापूर अर्बन बँकेचे अध्यक्ष संजय ओगले, प्रकाश कुवळेकर, शहरप्रमुख सौरभ खडपे, अरविंद लांजेकर, पाचल माजी उपसरपंच किशोर नारकर, उमेश पराडकर, आबा आडिवरेकर आदी उपस्थित होते.
-----
ग्राहकांचे म्हणणे ऐकून घ्या
विद्युत्‌पुरवठा खंडित झाल्यानंतर लोकांकडून वीजवितरण विभागाचे अधिकाऱ्यांशी मोबाइलद्वारे संपर्क साधण्याचा प्रयत्न केला जातो; मात्र, अनेकवेळा अधिकाऱ्यांचे मोबाईल फोन बंद असतात तसेच संपर्क झाला तरीही ते उचलत नाहीत, या तक्रारी लोकांनी सभेमध्ये मांडल्या. त्याची दखल घेताना आमदार सामंत यांनी सर्व अधिकाऱ्‍यांनी आपले मोबाईल बंद ठेवू नका, असे बजावले.