नरेंद्र डोंगर परिसरात
रविवारी ‘बिजारोपण’
सावंतवाडी ः निसर्ग संवर्धन जाणीव जागृती करत देशी फळ झाडांचे बिजारोपण करण्याच्या उद्देशाने रविवारी (ता. १५) सकाळी साडेसात ते साडेनऊ या वेळेत नरेंद्र डोंगर येथे बिजारोपण अभियानाचे आयोजन केले आहे. अभिनव फाउंडेशन सिंधुदुर्ग व भारतीय किसान संघ यांच्या संयुक्त विद्यमाने आयोजित केलेल्या या अभियानात पर्यावरणप्रेमी, शालेय विद्यार्थी, सामाजिक संस्था, संघटना, नागरिकांनी आणि सामाजिक कार्यकर्ते या सर्वांनी सहभागी व्हावे, असे आवाहन केले आहे. कोणत्याही फळ झाड्याच्या बिया येताना घेऊन यायच्या आहेत. ज्यांना प्रत्यक्ष येणे शक्य नाही, त्यांनी आपल्याकडील फळ झाडांच्या बिया आदिनारायण मंगल कार्यालय नजीक संजय स्टोअर्स येथील राजू केळुस्कर यांच्याकडे द्याव्यात किंवा अभय भिडे यांच्याशी संपर्क साधावा, असे आवाहन केले आहे. रविवारी सकाळी मारुती मंदिर येथे जमून या अभियानाची सुरुवात होणार आहे.
--------
सावंतवाडीत १५ ला
रक्तदान शिबिर
ओटवणे ः जागतिक रक्तदाता दिनाचे औचित्य साधून ऑन कॉल रक्तदाते संस्था, सावंतवाडी तालुका पत्रकार संघ आणि रोटरी क्लब ऑफ सावंतवाडी यांच्या संयुक्त विद्यमाने १५ जूनला सकाळी ९ ते दुपारी १ या वेळेत साधले मेसनजीक रोटरी क्लब ऑफ सावंतवाडीच्या सभागृहात रक्तदान शिबिर व रक्तदाता सन्मान सोहळ्याचे आयोजन केले आहे. या रक्तदान शिबिरात जास्तीत जास्त रक्तदात्यांनी रक्तदान करावे. इच्छुक रक्तदात्यांनी ऑन कॉल रक्तदाते संस्थेचे कार्याध्यक्ष महेश रेमुळकर, खजिनदार सिद्धार्थ पराडकर, सदस्य दिनेश गावडे, मंगेश माणगावकर, सचिव बाबली गवंडे, सावंतवाडी तालुका पत्रकार संघाचे खजिनदार रामचंद्र कुडाळकर, सदस्य दीपक गावकर यांच्याशी संपर्क साधावा, असे आवाहन ऑन कॉल रक्तदाते संस्थेचे अध्यक्ष दयानंद गवस, उपाध्यक्षा मीनल सावंत, रोटरी क्लब ऑफ सावंतवाडीचे अध्यक्ष प्रमोद भागवत, सावंतवाडी तालुका पत्रकार संघाचे अध्यक्ष सचिन रेडकर, सचिव विजय राऊत यांनी केले आहे.
---------
तेंडोली येथे आज
‘राजा रुक्मांगद’
कुडाळ ः तेंडोली-खरावतेवाडी येथील दादा गावडे यांच्या घरानजीक उद्या (ता. १०) सायंकाळी ७ वाजता जिल्ह्यातील निवडक दशावतार कलाकारांचे ‘राजा रुक्मांगद’ हे संयुक्त दशावतार नाटक आयोजित करण्यात आले आहे. यामध्ये गणपती - विनायक सर्वेकर, रिद्धी सिद्धी-चैतन्य गावडे, राजा रुक्मांगद-संजय वालावलकर, कलिदेव-महेश गवंडे, यमधर्म-सतीश बागवे, देवदूत/विष्णू-गिरीश राऊळ, देवदूत/राणी-सिद्धेश मुणनकर, मडवळ-मंगेश साटम, मडवळीण-विनायक सर्वेकर, इंद्र-विलास तेंडोलकर, नारद-बाळू कोचरेकर, माळी-बाबा कामत, सुंदरी-दीप निर्गुण या कलाकारांच्या भूमिका आहेत. हार्मोनियम-अमोल मोचेमाडकर, पखवाज-दादा आकेरकर व झांज-प्रथमेश गावडे अशी संगीत साथ आहे.
---
निर्वाह भत्ता योजना
अर्ज नोंदणी १५ पासून
सिंधुदुर्गनगरी ः शैक्षणिक वर्ष २०२५-२६ करिता भारत सरकार मॅट्रिकोत्तर शिष्यवृती, मॅट्रिकोत्तर शिक्षण शुल्क, परीक्षा शुल्क प्रदान, राजर्षी छत्रपती शाहू महाराज गुणवत्ता शिष्यवृती व व्यावसायिक पाठ्यक्रमाशी संलग्न वसतिगृहातील विद्यार्थ्यांना निर्वाह भत्ता योजनेचे नवीन अर्ज नोंदणी करणे व नूतनीकरण अर्ज नोंदणीची सुरुवात १५ जूनपासून महाडिबीटी पोर्टलवर संकेतस्थळावर उपलब्ध करण्यात येणार आहे. समाज कल्याणचे सहाय्यक आयुक्त संतोष चिकणे यांनी ही माहिती दिली.
......................
‘कसाल बेलाचीवाडी
बस फेरी पूर्ववत करा’
मसुरे ः विरण, बेलाचीवाडी-मुस्लिमवाडी एसटी बस गेली अनेक वर्षे सुरू आहे. मात्र, या वर्षी विरण, बेलाचीवाडी रस्त्याचे काम सुरू केल्याने एप्रिलपासून आतापर्यंत दोन महिने ही एसटी वाहतूक बंद केली आहे. या रस्त्याचे खडीकरण, डांबरीकरण पूर्ण होऊन आता १५ दिवस झाले, तरी अद्याप एसटी वाहतूक सुरू न झाल्याने प्रवासी जनतेची, शालेय विद्यार्थी यांची गैरसोय होत आहे. मालवण आगारप्रमख यांनी या समस्येची दखल घेऊन बंद असलेली सकाळची व सायंकाळची कसाल बेलाचीवाडी एसटी बस पूर्ववत सुरू करावी, अशी जनतेची मागणी आहे.