गोवंश सांभाळणाऱ्यांना अनुदान द्या
जगद्गुरू नरेंद्राचार्य ः कुटुंबाच्या संवर्धनासाठी होईल मदत
सकाळ वृत्तसेवा
रत्नागिरी, ता. १० : शासनाने शेतकऱ्यांना प्रत्येक गोवंशाच्या संगोपनासाठी अनुदान द्यावे जेणेकरून गोवंशाची हत्या थांबेल आणि हा गोवंश शेतकऱ्याच्या कुटुंबाचे संवर्धन करण्यासाठी एक प्रकारे मदतगार ठरू शकेल. अखिल हिंदू धर्माच्यावतीने आम्ही महाराष्ट्र शासनाकडे गोवंश संगोपन करणाऱ्या शेतकऱ्याला आर्थिक अनुदान द्यावे, अशी मागणी करत आहोत. विविध हिंदू धर्मासाठी काम करणाऱ्या संघटनांनी यासाठी महाराष्ट्र शासनाकडे गोवंश सांभाळणाऱ्या शेतकऱ्यांना शासनाने आर्थिक मदत करावी यासाठी पाठपुरावा करावा, असे आवाहन जगद्गुरू रामानंदाचार्य नरेंद्राचार्य महाराज यांनी केले आहे.
पोलिसांकडून दापोली येथे २८ गोवंशाची सुटका करण्याच्या कामगिरीबद्दल नरेंद्राचार्य महाराज यांनी जिल्हा पोलिस अधीक्षक नितीन बगाटे यांचे अभिनंदन केले. हिंदू धर्मात गोवंशाला महत्त्व आहे. गाईला तर आम्ही गो माता मानतो. अतिशय उपयुक्त असा हा प्राणी हिंदू धर्मात पूजनीय आहे. कायद्यानेही गोवंशाला संरक्षण दिले आहे. तरीही गोवंशाची कत्तल करण्यासाठी वाहतूक होत आहे. ते तातडीने थांबवले पाहिजे. गोवंशाचा सांभाळ करणाऱ्या प्रत्येक शेतकऱ्याला आर्थिक मदतीचा हात दिला पाहिजे जेणेकरून गोहत्या थांबेल. ही मदत मिळवून देण्यासाठी प्रत्येक हिंदू संघटनांनी शासनाकडे पाठपुरावा करणे गरजेचे आहे.