अंशकालीन कला, क्रीडा शिक्षक
भरतीचे धोरण अन्यायकारक

अजय शिंदे ः महासंघातर्फे शासनाचा निषेध

सकाळ वृत्तसेवा
मालवण, ता. १० : शासनाच्या अंशकालीन कला, क्रीडा शिक्षक भरती धोरणाचा महाराष्ट्र राज्य क्रीडा व शारीरिक शिक्षण महासंघ तीव्र निषेध करत असल्याचे महासंघाचे अध्यक्ष अजय शिंदे यांनी स्पष्ट केले आहे.
यासंदर्भात शिंदे यांनी पत्रक प्रसिद्धीस दिले आहे. त्यात म्हटले आहे की, राज्याने ५ जूनला जाहीर केलेल्या शासन निर्णयानुसार स्थानिक स्वराज्य संस्थांमधील उच्च प्राथमिक वर्ग सहावी ते आठवीसाठी अंशकालीन कला व क्रीडा शिक्षक पदे निर्माण केली आहेत. मात्र, हे धोरण राज्यातील बेरोजगार पात्र व प्रशिक्षित शिक्षक उमेदवारांवर अन्याय करणारे आणि शिक्षणाच्या दर्जावर घाला घालणारे आहे. या धोरणानुसार शिक्षकांना केवळ १५० रुपये प्रति तासाचे मानधन देण्यात येणार असून ४८ तासांचा कार्यभार म्हणजेच प्रत्यक्षात पूर्णवेळ शिक्षकांचे काम, पण मानधन केवळ १२ हजार रुपये प्रति महिना इतकेच असेल. जर अर्धवेळ अंशकालीन सेवा दिली तर केवळ सहा हजार रुपये मिळणार आहेत. आजच्या महागाईच्या काळात हे वेतन एका वेठबिगार कामगारापेक्षा कमी आहे. शिक्षणासारख्या पवित्र क्षेत्रात ही शोकांतिका म्हणावी लागेल. या अंशकालीन धोरणामुळे बेरोजगार शिक्षकांची फसवणूक होत आहे. भरती प्रक्रिया अस्पष्ट व अपारदर्शक आहे. शिक्षणाची गुणवत्ता धोक्यात येणार आहे आणि शासनाचा दुहेरी दृष्टिकोन उघड होत आहे, असे शिंदे यांनी म्हटले आहे. त्यामुळे ५ जूनचा अंशकालीन कला, क्रीडा शिक्षक संदर्भातील शासन निर्णय रद्द करून सुधारित अध्यादेश जाहीर करावा. उच्च प्राथमिक शिक्षक पदे पवित्र पोर्टलच्या माध्यमातून भरावीत. भरती प्रक्रिया पारदर्शक न्याय व स्थिर रोजगार देणारी असावी, अशा आमच्या ठाम मागण्या आहेत. राज्यभरातील सर्व प्रशिक्षित उमेदवार शिक्षक संघटना पालक वर्ग व शिक्षणप्रेमींनी या अन्यायकारक धोरणा विरोधात एकत्र येऊन आवाज उठवावा, अशी अपेक्षाही जिल्हा क्रीडा व शारीरिक शिक्षण शिक्षक महासंघाने व्यक्त केली आहे.