निधी वाटपावरून महायुतीत मिठाचा खडा
पशुसंवर्धनासाठी निधी; भाजपच्या नातूंची नाराजी
सकाळ वृत्तसेवा
चिपळूण, ता. १२ : रत्नागिरी जिल्हा नियोजन मंडळाकडून २०२४-२५ या आर्थिक वर्षात राज्य सरकारच्या पशुसंवर्धन विभागाच्या बांधकामासाठी निधी मंजूर झाला. यामध्ये १ कोटी ६२ लाख रत्नागिरी तर ३६ लाख निधी चिपळूणच्या दवाखान्याच्या दुरुस्तीसाठी देण्यात आला. उर्वरित अन्य ७ तालुक्यात निधी देण्यात आला नसून, केवळ रत्नागिरी आणि राजापूरच्या कंत्राटदारांचे भले करण्यासाठी या निधीची खैरात करण्यात आल्याचा आरोप माजी आमदार विनय नातू यांनी केला आहे. त्यामुळे रत्नागिरी जिल्ह्यातील महायुतीमध्ये पुन्हा एकदा मिठाचा खडा पडला आहे.
महायुतीचे घटक पक्ष असलेल्या राष्ट्रवादी आणि शिवसेनेत रायगड जिल्ह्यामध्ये संघर्ष सुरू आहे. खासदार नारायण राणे चिपळूणच्या दौऱ्यावर आल्यानंतर भाजप कार्यकर्त्यांनी पालकमंत्र्यांच्या विरोधात निधीवाटपावरून उघडपणे नाराजी व्यक्त केली. खासदार राणे यांनी हा विषय सौम्य केला असला तरी आता माजी आमदार आणि भाजपचे प्रदेश सरचिटणीस विनय नातू यांनी पालकमंत्र्यांच्या निधी वाटपावरील भूमिकेवर नाराजी व्यक्त केली आहे. राज्य सरकारच्या सचिव स्तरावरून या घटनेची चौकशी व्हावी, अशी मागणी नातू यांनी केली आहे. ते म्हणाले, जिल्हा परिषदेच्या पशुसंवर्धन विभागांतर्गत २१ कामे नियोजन मंडळाने मंजूर केली. ही सर्व कामे बांधकामाची आहेत. दवाखान्याच्या बाहेरील रिकामी जागा जनावरांना तपासण्याची असते; पण त्या ठिकाणी पेव्हरब्लॉक बसवले जात आहेत. एका वेगळ्या पद्धतीची ही कामे मंजूर झाली. प्रशासकीय मंजुरीसाठी निविदा प्रक्रिया राबवण्याचा हा प्रकार आहे. जुन्या इमारतीचे निर्लेखन करून नवीन बांधकामे सुरू आहेत. यामध्ये ७६ लाखाची कामे रत्नागिरी तालुक्याला, ३१ लाखांची कामे राजापूर, ४२ लाखांची चिपळूण तालुक्याला, ५ लाख संगमेश्वर, ३ लाख गुहागर तर अन्य उत्तर रत्नागिरी जिल्ह्यातील चार तालुक्यांना निधीच नसल्याची बाब निदर्शनास आली आहे.

चौकट
३५ पदे रिक्त
रत्नागिरी जिल्हा परिषदेअंतर्गत ५१ पशुसंवर्धन विभागातील वैद्यकीय अधिकाऱ्यांची ३५ पदे रिक्त आहेत. डॉक्टर नाहीत; पण इमारतींची दुरुस्ती सुरू असल्याचे चित्र पाहायला मिळत आहे. हा केवळ निधीचा अपव्यय असून, कंत्राटदारांच्या भल्यासाठी ठराविक तालुक्यांसाठी हा निधी दिला जात असल्याचा आरोप नातू यांनी केला आहे.
---