swt127.jpg
70123
हळदीचे नेरूरः येथील क्रमांक १ शाळेच्या इमारतीचे कामाला अखेर सुरुवात झाली आहे.

आमदार निलेश राणेंच्या सुचनेनंतर
हळदीचे नेरूर केंद्रशाळेचे काम सुरु
पालकांमधून समाधानः अनेक दिवसांपासून झाले होते दुर्लक्ष
सकाळ वृत्तसेवा
कुडाळ, ता. १२ः माणगाव खोऱ्यातील केंद्रशाळा हळदीचे नेरूर क्रमांक १ शाळेच्या बंदावस्थेत असलेल्या दोन वर्ग खोल्यांचे काम प्रशासनाने आमदार निलेश राणेंच्या सूचनेनंतर अवघ्या दोन दिवसांत सुरु केले. रखडलेले हे काम प्रत्यक्षात सुरू झाल्याने पालक वर्गातून समाधान व्यक्त करण्यात येत आहे.
माणगाव खोऱ्यामध्ये हळदीचे नेरूर या दुर्गम भागातील गावात १९५२ मध्ये दोन वर्ग खोल्यांची मातीची इमारत शाळेसाठी उभी करण्यात आली होती. ६३ वर्षानंतर म्हणजे फेब्रुवारी २०२५ मध्ये ती निर्लेखन करण्यात आली. निर्लेखनानंतर मार्च २०२५ मध्ये त्या इमारतीला जिल्हा वार्षिक २०२४-२५ मधून २ वर्ग खोल्या मंजूर झाल्या. मंजुरीनंतर ठेकेदाराने ती इमारत जमीनदोस्त केली होती. मात्र, नवीन काम सुरू केले नव्हते. त्यातच यावर्षी अवकाळी पावसाने पंधरा-वीस दिवस आधीच हजेरी लावल्यामुळे ठेकेदाराने शाळा इमारतीच्या कामाकडे काहीसे दुर्लक्ष केले.
पावसाळा सुरू झाल्यामुळे आता आपल्या मुलांची गैरसोय होणार, आपल्या मुलांची सोय कशी करणार? असा यक्ष प्रश्न शिक्षक वर्गांना पडला होता. दुसरीकडे पालक वर्गातून सुद्धा चिंता व्यक्त केली जात होती. याबाबतची माहिती आमदार राणेंना मिळाली. त्यांनी शाळेचे काम तात्काळ सुरू झालेच पाहिजे, अशा सक्त सुचना दिल्या. त्यानंतर प्रशासन व ठेकेदार यांनी दोन दिवसात म्हणजेच शाळा इमारतीचे काम सुरू केले. काम प्रत्यक्षात सुरू झाल्याने पालक वर्गातून समाधान व्यक्त करण्यात आले तसेच आमदार राणेंच्या कार्यपद्धतीचे सुद्धा कौतुक करण्यात आले.