साटवली ग्रामपंचायत अधिकारी पद भरा
जितेंद्र चव्हाण ः प्रशासनास निवेदन
सकाळ वृत्तसेवा
लांजा, ता. १३ ः तालुक्यातील साटवली ग्रामपंचायत येथे रिक्त असलेले ग्रामपंचायत अधिकारी पद तातडीने भरण्यात यावे, अशी मागणी सामाजिक कार्यकर्ते जितेंद्र चव्हाण यांनी केली आहे.
याबाबत गटविकास अधिकारी यांना सादर करण्यात आलेल्या निवेदनात म्हटले आहे की, साटवली ग्रामपंचायत विस्ताराने मोठी आहे तसेच ग्रामपंचायतीची लोकसंख्या जास्त असल्याने वारंवार अडचणी येत असतात. लोकांची कामे वेळेवर होणे गरजेचे असते; परंतु गेल्या चार ते पाच वर्षांपासून ग्रामपंचायतीमध्ये स्वतंत्र अधिकारी नसल्याने लोकांची मोठी गैरसोय होत आहे. दोन वर्षांपासून या ग्रामपंचायतीचा कार्यभार बेनी बुद्रूक ग्रामपंचायतच्या अधिकाऱ्यांच्याकडे सोपवण्यात आला आहे; मात्र त्यांनी त्यांना दिलेल्या वेळेच्या दिवशी अतिरिक्त कामामुळे ते उपस्थित असतीलच असे नाही. त्यामुळे साटवली गावातील लोकांची मोठी गैरसोय निर्माण होत आहे. त्यांची कामे वेळेवर होत नाहीत. ग्रामपंचायतीचा अतिरिक्त कार्यभार इसवली येथील ग्रामसेवक व त्यानंतर बेनी बुद्रूक येथील ग्रामसेवक यांच्याकडे होता; पण साटवली ग्रामपंचायतीला अद्यापही स्वतःचा ग्रामपंचायत अधिकारी मिळाला नाही. त्यामुळे ग्रामपंचायत हद्दीतील ग्रामस्थांची मोठी गैरसोय निर्माण होते तसेच लोकांना अनेकवेळा ग्रामपंचायतीमध्ये हेलपाटे मारावे लागतात. त्यामुळे साटवली ग्रामपंचायतीसाठी स्वतंत्र अधिकारी कायमस्वरूपी नेमण्यात यावा, अशी मागणी चव्हाण यांनी केली आहे. तसेच गटविकास अधिकारी संतोष म्हेत्रे यांच्याशी संपर्क साधला असता त्यांनी लवकरच सदरचे ग्रामपंचायत अधिकारीपद हे आपल्या मागणीनुसार भरले जाईल, असे आश्वासन दिले आहे.