रेशन दुकानदारांना मिळणार
थकीत कमिशन ः कदम
ऑनलाईन बैठकीत संघटना पदाधिकाऱ्यांशी संवाद
सकाळ वृत्तसेवा
चिपळूण, ता. २० ः रेशन दुकानदारांचे थकीत कमिशन येत्या आठ दिवसांत दिले जाईल, असे आश्वासन अन्न व नागरी पुरवठामंत्री छगन भुजबळ यांनी ऑनलाईन बैठकीत दिले. तसेच अन्य मागण्यांसाठी लवकरच बैठक घेणार असल्याची माहिती रत्नागिरी जिल्हा रेशनिंग व केरोसिन चालक-मालक संघटनेचे जिल्हाध्यक्ष अशोक कदम यांनी दिली.
कदम म्हणाले, गावागावात अनेक समस्यांचा सामना करत रेशन दुकानदार शिधापत्रिकाधारकांना धान्य वाटण्याचे काम प्रामाणिकपणे करत आहेत. असे असताना याच दुकानदारांना त्यांचे कष्टाचे कमिशन वेळेत मिळत नाही. त्यामुळे अनेक दुकानदारांवर उपासमारीची वेळ येत आहे. हा प्रकार संघटनेच्या माध्यमातून आमदार शेखर निकम यांच्यासह लोकप्रतिनिधींपर्यंत पोहोचवण्यात आला होता. त्यानुसार भुजबळ यांच्यासमवेत ऑनलाईन बैठक झाली. त्यामधील चर्चेत येत्या आठ दिवसांत थकीत कमिशन चालू महिन्यापर्यंत देण्याचे आश्वासन त्यांनी दिले आहे. तसेच दुकानदारांना २०१४ पासून लागू केलेल्या अन्नसुरक्षा कायद्यापासून महागाईप्रमाणे कमिशन वाढ करावी, २०१३ ते २०१८ या कालावधीतील धान्य वाहतुकीच्या फरकाची रक्कम मिळावी, धान्य वितरणाव्यतिरिक्त कराव्या लागणाऱ्या आधार सिडिंग, मोबाईल फिडिंग, ई-केवायसी, ई-श्रमयादीची माहिती देणे, दिव्यांग लाभार्थी शोधणे या कामांचा मोबदला द्यावा, धान्यविक्रीचे कमिशन विक्री होताच लगेच मिळावे, राज्यातील सर्व्हर व नेटवर्कमध्ये निर्माण होणाऱ्या समस्यांवर उपाययोजना करण्यात यावी, अशा मुद्द्यांवर चर्चा झाली. त्यावर सविस्तर चर्चा करण्यासाठी मुंबईत संघटनेच्या पदाधिकाऱ्यांसोबत बैठक घेण्याचे आश्वासन भुजबळ यांनी दिल्याचे कदम यांनी सांगितले. या बैठकीला आमदार शेखर निकम यांच्यासह वरिष्ठ अधिकारी व संघटनेचे जिल्हाध्यक्ष अशोक कदम, खजिनदार रमेश राणे आदी सहभागी झाले होते.