कोंडीवरेवासीयांनी घेतला
वीजबिल न भरण्याचा निर्णय

महावितरणला ग्रामपंचायतीचे पत्र; मीटर बदलल्यानंतर बिले वाढली
सकाळ वृत्तसेवा
सावर्डे, ता. २१ : महावितरणच्या मनमानी कारभाराला कंटाळून वीजबिले न भरण्याचा निर्णय संगमेश्वर तालुक्यातील कोंडीवरे येथील ग्रामस्थांनी घेतला आहे. तसे पत्र ग्रामपंचायतीने महावितरणला दिले आहे, अशी माहिती उपसरपंच जाकीर शेकासन यांनी दिली.
महावितरणला दिलेल्या पत्रानुसार दोन महिन्यांपूर्वी वीजग्राहकांची परवानगी न घेता आणि कोणतीच कल्पना न देता स्मार्ट वीजमीटर बसवण्यात आले आहेत. त्याद्वारे दोन महिन्याची वीज युनिट एकदाच आकारणी करून वीजबिले पाठवण्यास सुरूवात केली आहे.
१०० युनिटपर्यंत वेगळा युनिट दर असून, १०० च्या पुढे जादा युनिट दर आकारण्यात येत आहे. एक महिन्याची युनिट आकारणी न करता दोन महिन्यांची आकारणी एकाचवेळी करण्यात आल्याने युनिट संख्या १०० हून अधिक होत आहे. त्यामुळे युनिटचा दर जादा आकारण्यात आला. महावितरणच्या चुकीचा आणि मनमानी कारभाराचा फटका सर्वसामान्य वीजग्राहकांना बसला आहे. वीजमीटर बदलताना वीजग्राहकांना त्याची साधी कल्पना द्यायला हवी होती; मात्र तसे करण्यात आलेले नाही. वीजबिल कमी करून देण्यात यावे, अशी मागणी केली गेली आहे. वीजग्राहकांना दिलासा मिळत नाही तोपर्यंत वीजबिल न भरण्याचा निर्णय वीजग्राहकांनी घेतला आहे, अशी माहिती शेकासन यांनी दिली.
---