शिधाधारकांमध्ये ‘ई-केवायसी’बाबत उदासिनता
चिपळूण तालुक्यातील चित्र ; २० टक्के लाभार्थी परगावी
सकाळ वृत्तसेवा
चिपळूण, ता. ३ ः शिधापत्रिका ई केवायसी करण्यासाठी वारंवार मुदतवाढ देऊनही चिपळूण तालुक्यातील शिधापत्रिकाधारकांकडून ई-केवायसी प्रक्रिया पूर्ण करण्यात उदासीनता दाखवण्यात येत आहे. यात सर्वाधिक प्रमाण नोकरी करण्यासाठी दुसऱ्या जिल्ह्यात गेलेल्या चाकरमानी कुटुंबीयांचे आहे.
ई-केवायसी करण्यासाठी ३० जूनची मुदत देण्यात आली होती. यादरम्यान ई-केवायसी न झाल्यास शिधापुरवठा बंद होऊ शकतो, अशा सूचना जिल्हा पुरवठा विभागाने दिल्या होत्या. तरीही तालुक्यात आतापर्यंत फक्त ८९.५३ टक्केच ई-केवायसी पूर्ण झाली आहे. अद्याप तालुक्यात सुमारे २०.४७ टक्के शिधापत्रिकांची ई-केवायसी होणे बाकी आहे. यापूर्वी वारंवार मुदतवाढ दिल्यानंतर पुन्हा एकदा ३० जून पर्यंत मुदत देण्यात आली. या मुदतीत लाभार्थ्यांनी जवळच्या रास्तभाव धान्य दुकानामध्ये अथवा कॅम्पमध्ये जाऊन आपल्या अंगठ्याचा ठसा व आधार क्रमांक देऊन ई-केवायसी करावी. असे आवाहन करण्यात आले. ई-केवायसी करण्यासाठी आतापर्यंत अनेकदा शिबिरांचे आयोजन केले आहे. शिधा वितरणात सुसूत्रता आणण्यासाठी शिधापत्रिका ई-केवायसीद्वारे आधार कार्ड संलग्न करण्याची मोहीम राबवण्यात येत आहे. तालुक्यातील बहुतांश नागरिक नोकरी-व्यवसायासाठी स्थलांतरित झाले आहेत. काही जणांकडून गावाकडे येऊन ई-केवायसी करण्यास वेळ मिळत नसल्याचे सांगण्यात येते.
---------
कोट
शिधापत्रिकेला आधार कार्ड लिंक करून ई-केवायसी करणे गरजेचे आहे. यातून शिधापुरवठा करण्यात सुसूत्रता येण्यास मदत होणार आहे. ई-केवायसी प्रक्रिया पूर्ण होण्यासाठी पुरवठा विभागाकडून वारंवार शिबिरे आयोजित करण्यात आली होती, परंतु काही गावामधून यास कमी प्रतिसाद मिळत आहे.
--प्रवीण लोकरे तहसीलदार चिपळूण