rat१७p१४.jpg-
७८१८२
चिपळूण : येथील वालोपे रेल्वेस्थानकावर पे अँड पार्कची सुविधा उपलब्ध केल्यापासून वाहनेचोरीचा प्रकार थांबला आहे.
-------------

पे अॅण्ड पार्कमुळे दुचाकी चोरीला आळा
चिपळूण रेल्वेस्थानकावरील सुविधेचा परिणाम; दुचाकीसाठी २०, चारचाकीसाठी ४० रुपये
सकाळ वृत्तसेवा
चिपळूण, ता. १७ : चिपळूण रेल्वेस्थानकावर पे अँड पार्कची व्यवस्था केल्यापासून दुचाकी चोरीच्या प्रकाराला आळा बसला आहे. मागील सहा महिन्यात येथून एकही दुचाकी चोरीला गेलेली नाही किंवा दुचाकीमधील पेट्रोलही चोरीला गेलेले नाही.
चिपळूण रेल्वेस्थानकावरून रत्नागिरी, सिंधुदुर्ग, रायगड आणि खेड तालुक्यात दररोज प्रवास करणाऱ्या प्रवाशांची संख्या मोठी आहे. काही प्रवासी कामानिमित्त सकाळी मुंबईला निघून गेले तर रात्री उशिरा किंवा दुसऱ्या दिवशी परत येतात. हे प्रवासी पूर्वी आपली दुचाकी आणि चारचाकी रेल्वेस्थानकावर मिळेल त्या जागेत उभी करायचे आणि निघून जायचे. त्यांच्या वाहनांमधील इंधन चोरीला जायचे तर काहींच्या दुचाकीही चोरीला जायच्या.
सार्वजनिक बांधकाम विभागाने सहा महिन्यांपूर्वी वालोपे येथील चिपळूण रेल्वेस्थानकाचे सुशोभीकरण केले. रिक्षास्थानकासाठी जागा निश्चित केली तसेच रेल्वेस्थानकावर चारचाकी आणि दुचाकीसाठी जागा निश्चित केली. रेल्वेस्थानकाच्या दोन्ही बाजूने लोखंडी आणि पत्र्याच्या शेड बांधण्यात आल्या आहेत. कोकण रेल्वेने गार्डनच्या देखभाल दुरुस्तीचा आणि तेथे नव्याने सुरू केलेल्या सुविधांच्या देखभाल दुरुस्तीचा खर्च निघावा यासाठी पे अँड पार्कची व्यवस्था केली. दुचाकी मालकांकडून २४ तासासाठी वीस रुपये आणि चारचाकी मालकांकडून ४० रुपये घेतले जातात. हे पैसे घेण्यासाठी कोकण रेल्वेने खासगी एजन्सीला ठेका दिला आहे. एजन्सीचे दोन कर्मचारी २४ तास रेल्वेस्थानकावर असतात. पे अँड पार्कच्या ठिकाणी गाडी लावल्यानंतर या कर्मचाऱ्यांकडून वाहनमालकाला एक टोकन दिले जाते. वाहनाचा मालक परत आल्यानंतर त्याच्याकडून टोकन आणि ठरलेले पैसेही घेतले जाते. त्यामुळे रेल्वेस्थानकावरून वाहनेचोरीचा प्रकार पूर्णपणे थांबला आहे.

कोट
चिपळूण रेल्वेस्थानकावर पे अँड पार्कची व्यवस्था केल्यापासून सहा महिन्यात दुचाकीचोरीचे प्रकार पूर्णपणे थांबले आहेत. आम्हाला एखादा संशयित आढळला तरी आम्ही त्याची चौकशी करतो. रेल्वेने ठरवून दिलेले पैसे एजन्सीचे कर्मचारी आकारतात. त्यापेक्षा जास्त पैसे कोणी घेतले तर आमच्याकडे तक्रार करा, आम्ही निश्चित कारवाई करू.
- राहुल हडके, रेल्वे पोलिस निरीक्षक, चिपळूण रेल्वेस्थानक