swt2115.jpg
78931
कासार्डेः व्यवसाय मार्गदर्शन कार्यक्रमात बोलताना वंदना नागरगोजे. (छायाचित्र ः दत्तात्रय मारकड)

यशस्वी करिअरसाठी हवी निर्णयक्षमता
वंदना नागरगोजेः कासार्डे विद्यालयात ‘तीर्थवाडी’तर्फे व्यवसाय मार्गदर्शन
सकाळ वृत्तसेवा
तळेरे, ता. २१ : यशस्वी करिअरसाठी जिद्द, चिकाटी, अपार कष्ट करण्याची तयारी आणि योग्य निर्णयक्षमता महत्त्वाची भूमिका बजावतात, असे प्रतिपादन मुंबई येथील व्यवसाय मार्गदर्शक वंदना नागरगोजे यांनी कासार्डे माध्यमिक विद्यालयात आयोजित कार्यक्रमात केले. विठ्ठल रखुमाई मंदिर समिती ओझरम-तीर्थवाडी यांच्या वतीने या कार्यक्रमाचे आयोजन करण्यात आले.
व्यासपीठावर कासार्डे विकास मंडळ मुंबईचे स्थानिक व्यवस्था समितीचे कार्याध्यक्ष संजय पाताडे, प्रा. बी. बी. बिसुरे, श्री. नागरगोजे, पर्यवेक्षक एस. व्ही. राणे, विठ्ठल रखुमाई मंदिर समिती ओझरम तीर्थवाडीचे उपाध्यक्ष अशोक राणे, बाबू राणे, जितेंद्र राणे, ओझरम प्राथमिक शाळा क्र.१ चे मुख्याध्यापक विनायक जाधव, दीपक राणे व अन्य मान्यवर उपस्थित होते. मंदिर समितीच्या वतीने कार्याध्यक्ष पाताडे, प्रा. बिसुरे, सौ. नागरगोजे आदींचा शाल, श्रीफळ व पुष्पगुच्छ देऊन सत्कार करण्यात आला.
व्यवसाय मार्गदर्शक सौ. नागरगोजे यांनी प्रशालेतील विद्यार्थ्यांना कृषी, मेडिकल, इंजिनिअरींग, वन विभाग, पोलिस विभाग, न्याय क्षेत्र, आर्किटेक्चर, आयटीआय, पायलट, हवाई सुंदरी, सैन्य दल, बँकिंग क्षेत्र, क्लरिकल विभाग, फिल्म इंडस्ट्री, लेबर ऑफिसर, सोशल वर्कर, प्लंबिंग विभाग, ब्युटी पार्लर यांसारख्या अनेक करिअरच्या क्षेत्रावर मार्गदर्शन केले. कोणत्याही स्पर्धा परीक्षेसाठी सामान्यज्ञान फार महत्त्वाचे असते. त्यासाठी विद्यार्थ्यांनी लहान वयापासून नियमित वर्तमानपत्र वाचण्याची सवय लावावी, असे आवाहन त्यांनी यावेळी केले. सूत्रसंचालन बाबू राणे यांनी केले. आभार जितेंद्र राणे यांनी मानले.

चौकट
मुलांनी मार्गदर्शनातून योग्य प्रेरणा घ्यावी
प्रा. बिसुरे यांनी प्रशाळेत घेतलेल्या या कार्यक्रमाबद्दल विठ्ठल रखुमाई मंदिर समितीचे आभार मानले. कार्याध्यक्ष पाताडे यांनी अशा मार्गदर्शनातून विद्यार्थ्यांनी योग्य प्रेरणा घेऊन आतापासून योग्य क्षेत्र निश्चित करून मार्गक्रमण करण्याचे आवाहन केले.