रत्नागिरीत दोनशे एकरावर
ड्रोन निर्मितीचा प्रकल्प
उदय सामंतः सोलरमधील सेलचीही निर्मिती
रत्नागिरी, ता. २२ : ड्रोन तयार करणारी आरआरपी नावाची कंपनी रत्नागिरीत २०० एकर जागेवर प्रकल्प उभारणार आहे. सोलरमध्ये असणारे सेल आणि सेमीकंडक्टरसारख्या अत्याधुनिक तंत्रज्ञानावर आधारित प्रकल्प रत्नागिरीला एका वेगळ्या उंचीवर नेऊन ठेवलेत, अशी घोषणा उद्योगमंत्री उदय सामंत यांनी केली.
रत्नागिरीत पत्रकारांशी ते बोलत होते. ते म्हणाले, रत्नागिरीत नवीन उद्योग येत आहेत. प्रदूषणमुक्त उद्योग आणण्यावर आपला भर असल्याचे त्यांनी सांगितले. ड्रोन तयार करणारा प्रकल्प रत्नागिरीत आणण्याबाबत चर्चा झाली असून, आरआरपी या प्रकल्पाच्या मालकांनी तशी तयारी दर्शवली आहे. सुमारे दोनशे एकर जागेमध्ये हा प्रकल्प येणार आहे. त्याचप्रमाणे सोलर यंत्रणेमध्ये वापरण्यात येणारे सेल तयार करणारा उद्योगही या ठिकाणी येणार असल्याचे सामंत यांनी स्पष्ट केले. व्हीआयटी ही सेमीकंडक्टर बनवणारी कंपनी येत असून, त्यातून हजारो रोजगार उपलब्ध होणार आहेत. या कंपनीने १६ कोटी रुपये एमआयडीसीकडे भरले आहेत. ३१ कोटी रुपये येत्या काही दिवसात जमा करतील. त्यानंतर खर्‍या अर्थाने कंपनीच्या पायाभूत सुविधांच्या कामाला सुरवात होणार आहे. हा प्रकल्प लवकरच कार्यान्वित होईल, असे त्यांनी सांगितले.