पोलिसांना मारहाणप्रकरणी
गोव्याच्या दोघांना कारावास
सकाळ वृत्तसेवा
सिंधुदुर्गनगरी, ता. २८ ः कर्तव्यावर असलेल्या पोलिस कर्मचाऱ्यांना मारहाण करून शासकीय कामात अडथळा निर्माण केल्याप्रकरणी आरोपी रामा नवसो परवार (वय २९, रा. वडावल, बिचोली गोवा), रोहित गुरुदास परवार कासारपालकर (वय २२, रा. कासारपाल गोवा) यांना जिल्हा न्यायाधीश २ व अतिरिक्त सत्र न्यायाधीश श्रीमती व्ही. एस. देशमुख यांनी दोषी ठरवत १ महिना साधा कारावास आणि प्रत्येकी १ हजार रुपये दंड अशी शिक्षा सुनावली. सरकार पक्षातर्फे सरकारी अभियोक्ता रुपेश देसाई यांनी काम पाहिले. दोडामार्ग पोलिस ठाण्यातील पोलिस कर्मचारी कोरोना प्रतिबंधात्मक उपयोजना अंतर्गत फिर्यादी सुनील विश्वास बागल तथा तत्कालीन दोडामार्ग पोलीस उपनिरीक्षक दोडामार्ग हे २२ मार्च २०२० ला गोवा सिंधुदुर्ग सीमेवर कर्तव्य बजावत असताना वाहन तपासणीसाठी थांबविल्याचा राग मनात ठेवून आरोपी रामा व रोहित यांनी फिर्यादी व त्यांचे सहकारी यांना धक्काबुक्की करत वाहनाच्या केबलने मारहाण करून शासकीय कामात अडथळा निर्माण केला होता. याप्रकरणी बागल यांच्या तक्रारीनुसार या दोघांवर दोडामार्ग पोलिस ठाण्यात गुन्हा दाखल करण्यात आला होता. या प्रकरणी न्यायालयात झालेल्या सुनावणीत एकूण ७ साक्षीदार तपासण्यात आले. साक्षीदारांची साक्ष आणि सरकारी वकिलांचा युक्तिवाद ग्राह्य धरून न्यायालयाने आरोपींना १ महिना साधा कारावास आणि प्रत्येकी १ हजार रुपये दंड अशी शिक्षा सुनावली.