बालरंगभूमीतर्फे इतिहास महाराष्ट्राची अनोखी स्पर्धा
प्राथमिक फेरी १२ व १३ ऑगस्टला; एकत्रित सादरीकरण
सकाळ वृत्तसेवा
रत्नागिरी, ता. ३१ः बालरंगभूमी परिषदेतर्फे इतिहास महाराष्ट्राचा या स्पर्धेचे आयोजन करण्यात आले असून, त्यात नाट्य, नृत्य, गायन यांचा संगम करून एकत्रित सादरीकरण करणे अपेक्षित आहे. या स्पर्धेची प्राथमिक फेरी १२ ऑगस्टला चिपळूणमध्ये आणि १३ ऑगस्टला रत्नागिरीत होणार आहे. यामध्ये ५ ते १५ वयोगटातील मुले, मुली सहभाग घेऊ शकतील, असे आयोजकांनी सांगितले.
विद्यार्थ्यांमध्ये इतिहासाचे महत्त्व अधोरेखित व्हावे, ऐतिहासिक जडणघडण व्हावी आणि नाट्य, नृत्य, गायन या कलांद्वारे आपला गौरवशाली इतिहास सादर व्हावा या हेतूने घेण्यात येणारी ही स्पर्धा एकल आणि समूह अशा दोन गटांमध्ये होईल. एकल गटात वय वर्षे ५ ते १० असा एक विभाग असून ‘छत्रपती शिवाजी महाराज’ या विषयावर विद्यार्थ्यांना सादरीकरण करायचे आहे तर एकल गटात वय वर्षे ११ ते १५ असा दुसरा विभाग असून, या विभागासाठी आणि समूहगटासाठी ‘छत्रपती शिवाजी महाराज जन्म ते राज्याभिषेक’ असा विषय देण्यात आला आहे. एकल गटासाठी ५ मिनिटे आणि समूहगटासाठी १० मिनिटे असा सादरीकरण कालावधी देण्यात आला आहे. नाट्य, नृत्य, गायन यांचा संगम करून सादरीकरण अपेक्षित आहे. समूहगटात कमीत कमी ४ आणि जास्तीत जास्त १० विद्यार्थी सहभागी होऊ शकतात. अंतिम फेरीत विजेत्या स्पर्धक विद्यार्थी आणि संघांना रोख पारितोषिक, प्रशस्तिपत्रक आणि पुस्तके देऊन सन्मानित करण्यात येईल तर प्राथमिक आणि अंतिम स्पर्धेत सहभागी सर्व विद्यार्थ्यांना सहभाग प्रशस्तिपत्रक देण्यात येईल. जिल्ह्यातील सर्व शाळांनी आणि विद्यार्थ्यांनी यात उत्स्फूर्त सहभाग घ्यावा, असे आवाहन बालरंगभूमी परिषद, शाखा रत्नागिरीतर्फे करण्यात आले आहे. सहभागाकरिता रंगकर्मी नंदकिशोर जुवेकर, सीमा कदम, शौकत गोलंदाज यांच्याशी संपर्क साधावा, असे आवाहन करण्यात आले आहे.

चौकट
स्पर्धेचे वेळापत्रक असे
स्पर्धेची प्राथमिक फेरी १२ ऑगस्टला इंदिरा गांधी सांस्कृतिक केंद्र, चिपळूण आणि १३ ऑगस्टला येथील दैवज्ञ भवन, नाचणे रोड, रत्नागिरी येथे होणार आहे. प्राथमिक फेरीतून प्रावीण्य मिळवलेले प्रत्येक गटातील आणि विभागातील प्रथम २ स्पर्धक किंवा संघ अंतिम फेरीकरिता पात्र होतील. अंतिम फेरी २३ आणि २४ ऑगस्टला मुंबई येथे घेण्यात येणार आहे.