नेमळेसाठी स्वतंत्र ग्राम महसूल अधिकारी नेमा
ग्रामस्थांची मागणीः चार महिन्यांपासून शेतकऱ्यांची गैरसोय
सकाळ वृत्तसेवा
सावंतवाडी, ता. ७ ः तालुक्यातील महसूली गाव म्हणून ओळख असलेल्या नेमळे गावात गेले तीन चार महिने कायमस्वरूपी तलाठी (ग्राम महसूल अधिकारी) नसल्याने शेतकरी वर्गाची मोठी गैरसोय झाली आहे. सावंतवाडी तहसीलदारांनी ताबोडतोब याची दखल घेऊन नेमळे गावासाठी कायमस्वरूपी स्वतंत्र तलाठ्याची नेमणूक करावी, अशी मागणी शेतकऱ्यांमधून होत आहे.
तालुक्यातील नेमळे गावाला महसूली गाव म्हणून ओळखले जाते गेले. मात्र, गेले तीन चार महिने या गावात कायमस्वरूपी तलाठी नसल्याने शेतकरी वर्गाची मोठी गैरसोय होताना दिसून येत आहे. या अगोदर या गावासाठी एक तलाठी काम पहात होते. त्यांची बदली तळवडे येथे झाल्यावर नेमळे गावासाठी निरवडे येथील तलाठी सोमवार आणि बुधवार असे दोन दिवस काम पाहत होते. मात्र, तेही तलाठी रजेवर असल्यामुळे शेतकऱ्यांची सातबारा अभावी बरीच शासकीय तसेच बँक कर्ज प्रकरणासाठी कामे अडकून राहिली आहेत. त्यातच २०२५-२६ ची पिक पाहणी नोंद घालण्यासाठी १४ ऑगस्ट शेवटची तारीख असताना पिक पाहणी अॅपच बंद असल्याकारणाने खरीप हंगामातील भात पिकाची नोंद घालता येत नाही. यामुळे शासनाच्या सर्व लाभापासून नेमळे महसलातील शेतकरी वंचित राहणार आहेत. सावंतवाडी तहसीलदारांनी ताबोडतोब याची दखल घेऊन नेमळे गावासाठी कायम स्वरूपी स्वतंत्र तलाठ्याची नेमणूक करून होणारी शेतकऱ्याची गैरसोय दूर करावी, अशी मागणी नेमळे गावातील शेतकरी वर्गाकडून करण्यात येत आहे.