तळवडेत एक्स-रे तपासणी शिबिर
सकाळ वृत्तसेवा
रत्नागिरी, ता. ८ : ग्रामपंचायत तळवडे, आयुष्यमान आरोग्य मंदिर तळवडे, क्षयरोग पथक राजापूर आणि जिल्हा क्षयरोग केंद्र रत्नागिरी यांच्या संयुक्त विद्यमाने बुधवारी (ता. ६) टीबीमुक्त भारत अभियानांतर्गत एक्स-रे तपासणी शिबिराचे आयोजन करण्यात आले होते. यामध्ये १८५ रुग्णांची एक्स-रे व सीवायटीबी (CYTB) चाचणी करण्यात आली.
या शिबिरामध्ये टीबी प्रतिबंध आणि नियंत्रणासाठी स्थानिक पातळीवर महत्त्वाचे पाऊल उचलण्यात आले. शिबिराचे उद्‍घाटन ग्रामपंचायत तळवडे येथील सरपंच गायत्री साळवी, उपसरपंच शांताराम साळवी व सदस्या प्रेरणा गुरव यांच्या प्रमुख उपस्थितीत पार पडले. जिल्हा क्षयरोग अधिकारी डॉ. महेंद्र गावडे यांच्या मार्गदर्शनाखाली रत्नागिरी जिल्ह्यात टीबीमुक्त भारत अभियान यशस्वीपणे राबवले जात आहे. या अनुषंगाने हा कार्यक्रमाच्या यशस्वी आयोजनासाठी पीपीएम को-ऑर्डिनेटर श्रीकांत सावंत, जिल्हा सुपरवायझर मंगेश पाटील, एक्स-रे टेक्निशियन श्रीहांगे, एसटीएस राहुल कोकणे, एसटीएलएस आचल मळेकर तसेच राजापूर क्षयरोग पथक आणि प्राथमिक आरोग्यकेंद्र करत कारवलीतिठा येथील आरोग्य साहाय्यक टी. बी. पाटील, के. व्ही. भांडे यांनी महत्त्वपूर्ण भूमिका बजावली. तसेच समुदाय आरोग्य अधिकारी, आरोग्यसेविका, आरोग्यसेवक, गटप्रवर्तक व सर्व आशा कार्यकर्त्यांच्या एकत्रित प्रयत्नातून एकूण १८५ रुग्णांची एक्स-रे व सीवायटीबी (CYTB)चाचणी करण्यात आली. टीबीमुक्त भारत या ध्येयाच्या दिशेने उचललेले हे महत्त्वपूर्ण पाऊल ग्रामपंचायतीच्या, आरोग्य विभागाच्या आणि स्थानिक नागरिकांच्या सहकार्याने अत्यंत यशस्वी ठरले, असे जिल्हा क्षयरोग अधिकारी डॉ. महेंद्र गावडे यांनी सांगितले.