N83080

जिल्हा ज्युदो स्पर्धेत
हेमांगी मेस्त्री प्रथम
सकाळ वृत्तसेवा
ओटवणे, ता. ८ः ओरोस येथे झालेल्या जिल्हास्तरीय ज्युदो स्पर्धेत चराठा गावची कन्या व माजगाव येथील श्री भाईसाहेब सावंत माध्यमिक विद्यालयाची विद्यार्थिनी हेमांगी मेस्त्री हिने प्रथम क्रमांक पटकावला. तिची कोल्हापूर येथे होणाऱ्या विभागीय ज्युदो स्पर्धेसाठी निवड झाली. हेमांगी हिने यापूर्वी राष्ट्रीय व राज्यस्तरीय पॉवर लिफ्टिंग स्पर्धेत चमकदार कामगिरी केली आहे.
तिला प्रशिक्षक मंगेश घोगळे, जिम ट्रेनर अबिद कित्तूर, माजगाव हायस्कूलचे क्रीडाशिक्षक चंद्रशेखर सावंत यांचे मार्गदर्शन लाभले. हेमांगी भाईसाहेब सावंत विद्यालयात दहावीत शिकत आहे. या यशाबद्दल तिचे माजगाव शिक्षण सहाय्यक संस्थेचे अध्यक्ष भास्कर कासार, सचिव सीए लक्ष्मण नाईक, मुख्याध्यापक भाऊसाहेब चवरे व शिक्षक कर्मचारी यांनी अभिनंदन केले.
......................
83081

आपत्ती व्यवस्थापनाचे
होडावडेवासीयांना धडे
सकाळ वृत्तसेवा
सावंतवाडी, ता. ८ः होडावडा ग्रामपंचायत येथे केंद्राच्या राष्ट्रीय आपत्ती निवारण दलाच्या (एनडीआरएफ) वतीने आज आपत्कालीन परिस्थिती हाताळण्याबाबत प्रशिक्षण कार्यक्रम घेण्यात आला. यंदाच्या पावसाळ्यात होडावडा गाव पूरग्रस्त झाल्याच्या पार्श्वभूमीवर हे प्रशिक्षण घेण्यात आले.
इन्स्पेक्टर आर. जे. यादव यांच्या नेतृत्वाखालील १५ जणांच्या टीमने ग्रामस्थांना सखोल मार्गदर्शन केले. यामध्ये भूकंपपूर्व आणि भूकंपपश्चात घ्यावयाची काळजी, आग व वणव्यासारख्या परिस्थितीत बचाव, सर्पदंश झाल्यास काय करावे आणि विषारी सापांची ओळख, आपत्कालीन परिस्थितीत घरगुती साहित्याचा वापर करून जीव वाचवण्यासाठीच्या उपाययोजनांबद्दल माहिती देण्यात आली.
या कार्यक्रमासाठी वेंगुर्ले तहसीलदार ओंकार ओतारी यांचे मार्गदर्शन लाभले. यावेळी मंडळ अधिकारी प्रेरणा गिरप, तलाठी नेहा गावडे, पोलिसपाटील मनोज होडावडेकर उपस्थित होते. गावकऱ्यांनी या प्रशिक्षणाला उत्स्फूर्त प्रतिसाद दिला.