प्रशासनाच्या आश्वासनाअंती
बरेगार यांचे उपोषण स्थगित

सकाळ वृत्तसेवा
सिंधुदुर्गनगरी, ता. ७ ः तत्कालीन माणगाव वनपाल यांच्या विरोधात ७ एप्रिल २०२१ ला कुडाळ पोलिस ठाण्यात दिलेल्या तक्रारीला तीन वर्षे उलटली, तरी दखल घेतली नसल्याने व अद्याप कोणतीही कारवाई झाली नसल्याने जिल्हा पोलिस अधीक्षकांचे लक्ष वेधण्यासाठी जयंत बरेगार यांनी पोलिस अधीक्षक कार्यालयासमोर उपोषण सुरू केले होते. चार आठवड्यांत चौकशी करून कारवाई करण्याच्या पोलिस प्रशासनाच्या लेखी आश्वासनानंतर त्यांनी ते स्थगित केले.
माणगाव येथील तत्कालीन वनपाल यांच्या विरोधात बरेगार यांनी ७ एप्रिल २०२१ ला कुडाळ पोलिस ठाण्यात तक्रार अर्ज दाखल केला होता. त्यावर तब्बल १३ महिन्यांनी गुन्हा दाखल केला. त्यानंतर जिल्हा पोलिस अधीक्षकांचे निवेदनाद्वारे लक्ष वेधले असता त्यांच्यावतीने आतापर्यंत तीन वरिष्ठ पोलिस अधिकाऱ्यांमार्फत चौकशी केली; मात्र अद्याप कारवाई झाली नाही. यासाठी बरेगार यांनी न्याय मागण्यांसाठी गुरुवारपासून (ता. ७) उपोषण सुरू केले होते. आज दुसऱ्या दिवशी पोलिस उपअधीक्षकांनी (मुख्यालय) याप्रकरणी कणकवली उपविभागीय पोलिस अधिकारी चौकशी करीत असून, चार आठवड्यांत चौकशी अहवाल दिला जाईल व त्याबाबत आपल्याला अवगत केले जाईल, असे पत्र दिल्याने बरेगार यांनी उपोषण चार आठवड्यांसाठी स्थागित केले.