83704

कुणकेश्वरमध्ये भोलेनाथाच्या दर्शनासाठी भाविकांची रिघ

तृतीय श्रावण सोमवार; वाडा, विजयदुर्गसह देवगड मंदिरातही गर्दी

सकाळ वृत्तसेवा
देवगड, ता. ११ : तालुक्यातील श्री क्षेत्र कुणकेश्वर मंदिरात आजच्या तिसऱ्या श्रावण सोमवारनिमित्ताने भाविकांची दर्शनासाठी गर्दी होती. मंदिरात दर्शनासाठी रांग लागली होती. दिवसभरात विविध मान्यवर, विविध राजकीय पक्षांच्या नेतेमंडळींनी दर्शन घेतले. दरम्यान, तालुक्यातील वाडा येथील श्री देव विमलेश्‍वर मंदिर, विजयदुर्ग येथील श्री देव रामेश्‍वर मंदिर तसेच येथील शहरातील श्री ब्राह्मणदेव मंदिरातही भाविकांची दर्शनासाठी वर्दळ होती.
श्रावण महिन्यातील आजचा तिसरा सोमवार होता. या निमित्ताने श्री देव कुणकेश्वर मंदिरात दर्शनासाठी भाविकांची रांग लागली होती. मंदिरात विधिवत पूजा झाल्यावर मंदिर भाविकांना दर्शनासाठी खुले करण्यात आले. मंदिरात विविध मंडळांची भजने सुरू होती. त्याला श्रोत्यांकडून प्रतिसाद होता. तालुका, जिल्हा तसेच लगतच्या जिल्ह्यातील भाविक दर्शनासाठी आल्याचे दिसत होते. राजापूरचे आमदार किरण ऊर्फ भैया सामंत यांच्या माध्यमातून एसटीने तेथील भाविक दर्शनासाठी आले होते. रत्नागिरी आगारातूनही कुणकेश्‍वर मार्गावर जादा गाडी सोडण्यात आली होती. एसटी, खासगी वाहने घेऊन भाविक कुणकेश्‍वर दर्शनासाठी आल्याचे चित्र होते. मंदिर परिसर भाविकांनी गजबजला होता. पाऊस नसल्याने भक्तांना सोयीचे झाले होते. उशिरापर्यंत भाविक दर्शनासाठी येत होते. दिवसभरात विविध मान्यवर, राजकीय नेतेमंडळी यांनी दर्शन घेतले.
---
अखेरच्या सोमवारी गर्दीची शक्यता
कुणकेश्‍वर मार्गावर वाहनांची वर्दळ सुरू होती. मंदिर आणि परिसरात भाविकांची वर्दळ होती. मंदिरात दुपारी खिचडी प्रसाद वाटप केला जात होता. तालुक्यातील वाडा येथील श्री देव विमलेश्‍वर मंदिर, विजयदुर्ग येथील श्री देव रामेश्‍वर मंदिर येथेही दर्शनासाठी भाविकांची वर्दळ होती. येथील शहरातील श्री ब्राह्मणदेव मंदिरातही भाविकांची दर्शनासाठी गर्दी झाली होती. यंदाच्या श्रावण महिन्यातील अखेरच्या सोमवारी (ता.१८) भाविकांची गर्दी होण्याची शक्यता असल्याने तसे नियोजन करण्यात येणार आहे.