कलमठ गावासाठी स्वतंत्र फिडर
उभारणीची महावितरणकडून ग्‍वाही
ठाकरे शिवसेनेचे आंदोलन स्थगित; राजू राठोड यांची माहिती
कणकवली, ता. १४ः तालुक्‍यातील कलमठ गावासाठी स्वतंत्र फिडर उभारणीची कार्यवाही महावितरणने सुरू केली आहे. तसे लेखी पत्र महावितरणच्या उपकार्यकारी अभियंत्‍यांनी दिले आहे. त्‍यामुळे महावितरण कार्यालयासमोर १५ ऑगस्ट रोजी होणारे ठाकरे शिवसेनेचे आंदोलन स्थगित करण्यात आल्‍याची माहिती ठाकरे शिवसेनेचे पदाधिकारी राजू राठोड यांनी आज दिली.
श्री. राठोड म्‍हणाले, कलमठ गावासाठी स्वतंत्र फिडर नाही. खारेपाटण येथून येणाऱ्या ११ केव्ही लाईनवरून कलमठला वीज पुरवठा होतो. या लाईमध्ये सातत्‍याने बिघाड होत असल्‍याने कलमठ गावाचा वीज पुरवठा वारंवार खंडित होत आहे. त्‍यामुळे कलमठ गावासाठी स्वतंत्र फिडर उभारणीची कार्यवाही करावी, अन्यथा १५ ऑगस्ट रोजी महावितरण कार्यालयासमोर आंदोलन करण्याचा इशारा आम्‍ही चार दिवसापूर्वी महावितरणला दिला होता.
ते म्‍हणाले, या आंदोलनाची दखल महावितरणने घेतली आहे. त्‍याअनुषंगाने महावितरणच्या उपकार्यकारी अभियंत्‍यांनी लेखी पत्र दिले आहे. त्‍यात कलमठ गावासाठी स्वतंत्र फिडर तयार करण्याची कार्यवाही सुरू असल्‍याचे नमूद केले आहे. महावितरण अभियंत्‍यांच्या पत्रात म्‍हटले आहे की, खारेपाटण फिडरचे विभाजन करण्याचा प्रस्ताव प्रस्तावित आहे. त्‍यासाठीचे सर्वेक्षण देखील पूर्ण झाले आहे. या कामांच्या पायाभूत उभारणीसाठी महामार्ग प्राधिकरण, कणकवली नगरपंचायत यांच्या परवानगी घेण्याचे काम सुरू आहे.
महावितरणने दिलेल्‍या लेखी आश्‍वासनामुळे १५ ऑगस्ट रोजी होणारे आंदोलन आम्‍ही तात्‍पुरते स्थगित केले असल्‍याची माहिती राजू राठोड यांनी दिली. तसेच येत्‍या महिन्याभरात स्वतंत्र फिडर उभारणीच्या कामाला प्रारंभ न झाल्‍यास पुन्हा आंदोलन छेडण्याचा इशारा देखील श्री. राठोड यांनी दिला.