85234

संदीप गावडे यांचे राजकीय
भविष्य उज्वल ः काळसेकर

‘सुंदरवाडी’ दहीहंडी उत्सवाचे उद्‍घाटन

सावंतवाडी, ता. १८ ः संदीप गावडे यांच्यावर सोपवलेली जबाबदारी ते यशस्वीरित्या पार पडतात, हे ‘हर घर तिरंगा’ अभियानाच्या माध्यमातून समोर आले. त्यांनी केलेल्या यशस्वी नियोजनामुळेच या अभियानामध्ये सिंधुदुर्ग जिल्हा राज्यात प्रथम आला. त्यांचे काम आणि कार्य पाहता भविष्यात ते निश्चितच वेगळी उंची गाठतील, असे गौरवोद्गार सिंधुदुर्ग जिल्हा बँकेचे उपाध्यक्ष अतुल काळसेकर यांनी काढले.
भाजपचे युवा नेतृत्व संदीप गावडे आयोजित सुंदरवाडी दहीहंडी उत्सवाच्या उद्‍घाटन प्रसंगी ते बोलत होते. व्यासपीठावर जिल्हाध्यक्ष प्रभाकर सावंत, जिल्हा बँक अध्यक्ष मनीष दळवी, भाजप युवा मोर्चा प्रदेश उपाध्यक्ष युवराज लखमराजे भोसले, युवा नेते संदीप गावडे, संदीप गावडे यांच्या मातोश्री सौ. सुनीता गावडे, वडील एकनाथ गावडे, सावंतवाडी शहर मंडल अध्यक्ष सुधीर आडिवरेकर, जिल्हा बँक संचालक रवी मडगावकर, मनोज नाईक, आनंद नेवगी, पंकज पेडणेकर, दिलीप भालेकर, शेखर गावकर, शर्वाणी गावकर, शीतल राऊळ आदी उपस्थित होते. श्री. काळसेकर म्हणाले, ‘‘संदीप गावडे हे उभरते नेतृत्व आहेत. भाजप प्रदेशाध्यक्ष रवींद्र चव्हाण यांच्या प्रेरणेतून ते पक्षाचे कार्य करत आहेत. त्यांचे सामाजिक काम पाहता पंचायत समिती सदस्यपदी त्यांना जनतेने बहुमताने निवडून दिले होते. आज त्यांच्याच नेतृत्वाखाली त्यांच्या विभागातील बहूतांशी ग्रामपंचायतीचे सरपंच ते निवडून आणू शकले. येणाऱ्या काळात याच कामाच्या जोरावर ते निश्चितच राजकारणात मोठी उंची गाठतील.’’