85224

चला, परुळेबाजार ‘ॲनिमिया’मुक्त करूया

ग्रामसभेत नियोजन; महिला स्नेही गाव संकल्पनेंतर्गत उपक्रम

सकाळ वृत्तसेवा
म्हापण, ता. १८ ः गाव विकास आराखड्यातील महिला स्नेही गाव संकल्पने अंतर्गत रक्तक्षय (अॅनिमिया) मुक्त गाव करण्यासाठी नियोजन सभा परुळे बाजार ग्रामपंचायत येथे झाली. जिल्ह्यातील परुळे बाजार गावात अनिमिया मुक्त गाव हा उपक्रम राबविण्यात येणार आहे. याबाबत यावेळी चर्चा करण्यात आली.
स्त्रिया तसेच किशोरवयीन मुलींमध्ये वाढते अॅनिमियाचे प्रमाण व त्यामुळे निर्माण होणाऱ्या गंभीर स्वरूपाच्या समस्यांवर लक्ष केंद्रित करून त्यावर उपाययोजना करण्यासाठी यशदा महाराष्ट्र, जिल्हा परिषद, पंचायत समिती तसेच सहायक ट्रस्टतर्फे महिला स्नेही संकल्पने अंतर्गत जिल्ह्यातील परुळे बाजार गावात अनिमिया मुक्त गाव हा उपक्रम राबविण्यात येणार आहे. यासाठी नुकतीच परुळेबाजार नियोजन बैठक घेण्यात आली.
या बैठकीस यशदा मार्फत सहायक ट्रस्टचे प्रशिक्षक तसेच कार्यक्रम समन्वयक प्रमोद शिंदे उपस्थित होते. श्री. शिंदे यांनी अॅनिमिया हा आजार नसून शारीरिक स्थिति असल्याचे स्पष्ट केले. त्यावर मात करण्यासाठी माहिती व उपाययोजना याविषयीची माहिती दिली. यावेळेस शिंदे यांनी अॅनिमिया मुक्त गाव करताना यासाठी वार्षिक नियोजन, यात हिमोग्लोबिन तपासणी, आरोग्य, पोषण आणि सेंद्रिय पोषण परसबाग निर्मितीवर प्रशिक्षण, भिंती रंगविणे, गावात होणाऱ्या स्पर्धा, त्यासाठी येणाऱ्या खर्चाचा आराखडा तसेच यात शाळा, अंगणवाडी, प्राथमिक आरोग्य केंद्र, उमेद व मावीमची भूमिका गावाचे नेतृत्व म्हणून सरपंच व पंचायत सदस्य यांची भूमिका याशिवाय शासन स्तरावरून ग्राम विकास अधिकारी तसेच पंचायत समितीवरून विस्तार अधिकारी तसेच गट विकास अधिकारी यांचे सहकार्य यावर मांडणी केली.
यावेळेस अॅनिमिया फ्री इंडिया फोरमचे प्रशिक्षक स्थानिक संस्था गोपुरी आश्रम कणकवली संस्थेचे श्री. नेवगे यांनी वर्षभरात त्यांच्याकडून राबविण्यात येणारे नियोजन सांगितले.
---
जिल्ह्यात निवडलेले एकमेव गाव
बैठकीच्या शेवटी सरपंचांनी जिल्ह्यातून केवळ आमचे एकच गाव या कार्यक्रमासाठी निवडले असल्याने अभिमान व्यक्त करत आता जबाबदारी वाढल्याचे नमूद केले. तसेच वरील सर्व उपक्रम राबवून गाव नक्कीच ‘अॅनिमिया’ मुक्त करू, असे जाहीर केले. या बैठकीचे नियोजन श्री. शिंदे यांनी केले. बैठकीस प्रशिक्षक हर्षदा वाळके, उपसरपंच संजय दूधवडकर, सदस्य सुनाद राऊळ, सीमा सावंत, तन्वी दूधवडकर, नमिता परुळेकर, ग्राम संघाचे अध्यक्ष व सचिव, प्रभाग प्रमुख, आशा, अंगणवाडी कर्मचारी, प्राथमिक आरोग्य केंद्राचे प्रतिनिधी उमेद प्रभाग समन्वयक उपस्थित होते.