85260

गणेशोत्सवाचे योग्य नियोजन करा

प्राजक्ता बांदेकर ः कुडाळमध्ये प्रशासनाला सूचना

सकाळ वृत्तसेवा
कुडाळ, ता. १८ ः गणेश उत्सवासाठी कुडाळ नगरपंचायत सज्ज झाली असून, नगराध्यक्ष प्राजक्ता बांदेकर यांच्या अध्यक्षतेखाली नियोजनाची बैठक नुकतीच झाली. यामध्ये पार्किंग व्यवस्था, फिरत्या भाजी विक्रेत्यांसाठी जागा यावर सविस्तर चर्चा करण्यात आली.
गणेशोत्सव नियोजनासंदर्भात येथील नगरपंचायतीत नुकतीच सभा झाली. यावेळी पोलिस निरीक्षक राजेंद्र मगदूम, एमआयडीसी अभियंता अविनाश रेवंडकर, मुख्याधिकारी अरविंद नातू, गटनेता विलास कुडाळकर, नगरसेवक राजीव कुडाळकर, उदय मांजरेकर, गणेश भोगटे, नगरसेविका नयना मांजरेकर, चांदणी कांबळी तसेच बांधकाम विभाग, एसटी महामंडळ, आरोग्य विभागाचे अधिकारी व कर्मचारी उपस्थित होते.
यावेळी एसटी महामंडळाला सूचना दिल्या. गणेशोत्सव काळात शहरात बससाठी एकमार्ग करावा, जेणेकरून वाहतूक कोंडी होऊ नये. मुख्य रस्त्यावर भाजी विक्रेत्यांनी विक्रीसाठी बसू नये. गणेशोत्सव कालावधीमध्ये केवळ उत्सवासाठी लागणारे माटी साहित्य विक्री करण्यास परवानगी दिली आहे. शहरातील विविध भागांमध्ये स्वच्छता, विद्युत पुरवठा याकडे कटाक्षाने लक्ष देण्यासंदर्भात नगराध्यक्ष बांदेकर यांनी अधिकाऱ्यांना सूचना केल्या. हा सण उत्सवाचा आणि आनंदाने साजरा करावा, असे आवाहन नगराध्यक्ष बांदेकर यांनी केले.