‘आम्हाला शासन सेवेत सामावून घ्या’

आरोग्य अभियान कंत्राटींचे आजपासून ‘कामबंद’

सकाळ वृत्तसेवा
सिंधुदुर्गनगरी, ता. १८ ः राष्ट्रीय आरोग्य अभियान अंतर्गत कार्यरत कर्मचारी यांना शासन सेवेत सामावून घेण्याचा निर्णय होऊन सव्वा वर्ष झाले तरी या कर्मचाऱ्यांना शासन सेवेत सामावून घेतलेले नाही. मागण्यांकडे शासनाकडून दुर्लक्ष होत असून कर्मचाऱ्यांमध्ये नाराजीचे वातावरण निर्माण झाले आहे. आपल्या न्याय मागण्यांकडे शासनाचे लक्ष वेधण्यासाठी कर्मचाऱ्यांनी १९ ते २२ ऑगस्ट या चार दिवसांत कामबंद आंदोलनाचे हत्यार उपसले आहे. याबाबतचे निवेदन राष्ट्रीय आरोग्य अभियान अधिकारी कर्मचारी संघटना सिंधुदुर्गच्या वतीने शासन आणि प्रशासनाला दिले आहे.
राष्ट्रीय आरोग्य अभियान अंतर्गत गेली १० वर्षे कार्यरत असलेल्या कंत्राटी कर्मचाऱ्यांना शासन सेवेत घेण्याबाबत १४ मार्च २०२४ ला शासन निर्णय झाला. या निर्णयाला आता सव्वा वर्षे उलटले तरी या कर्मचाऱ्यांना शासन सेवेत सामावून घेतलेले नाही. या कर्मचाऱ्यांना समावून घेण्याचा निर्णय प्रलंबित असतानाच नव्याने पदभरती केली जात आहे. हा एक प्रकारे कंत्राटी कर्मचाऱ्यांवर अन्यायच आहे. हे कर्मचारी अल्प मानधनात काम करत असून गेली ५ ते ६ महिने मासिक वेतन वेळेत न होता २ ते ३ महिने ते थकीत राहते. त्यामुळे या कर्मचाऱ्यांवर उपासमारीची वेळ येत आहे. समायोजन आणि दरमहा वेतन मिळावे आदी मागण्यांकडे शासनाचे लक्ष वेधण्यासाठी या कर्मचाऱ्यांनी १९ ते २२ ऑगस्ट या चार दिवसांचे कामबंद आंदोलन पुकारल्याची माहिती राष्ट्रीय आरोग्य अभियान अधिकारी कर्मचारी संघटना जिल्हाध्यक्ष हेमदिप पाताडे यांनी दिली आहे.
--------------
प्रमुख मागण्या अशा...
* १४ मार्च २०२४ च्या शासन निर्णयानुसार समायोजन व्हावे
* दरमहा वेळेत वेतन द्यावे
* कंत्राटी कर्मचाऱ्यांचे समायोजन होत नाही तो पर्यंत नव्याने पदभरती करू नये
* २०२४-२५ ची मासिक वेतनवाढ व लॉयल्टी बोनस द्यावा
* समुदाय आरोग्य अधिकारी यांचे बदली धोरणानुसार एनएचएम अधिकारी कर्मचाऱ्यांना बदली धोरण लागू करावे
* ईपीएफ योजना व गट विमा लागू करावा