साडेतीन लाखाची दारू
कणकवली येथे जप्त

वरवडेतील एकावर गुन्हा

कणकवली, ता. १८ ः शहरातील नाथ पै नगर येथे स्थानिक गुन्हा अन्वेषण पोलिसांनी ३ लाख ५४ हजार ४०० रूपये किंमतीची गोवा बनावटीची दारू जप्त केली. मोटारीतून या दारूची वाहतूक केली जात होती. या प्रकरणी प्रकाश सुरेश सावंत (वय ३५, रा.वरवडे) याच्यावर गुन्हा दाखल करण्यात आला.
पोलिसांनी दिलेल्या माहितीनुसार, कणकवली पोलिसांचे पथक पेट्रोलिंग करत असताना सायंकाळी सव्वाचार वाजता नरडवे रोडरून नाथ पै नगरकडे जाणाऱ्या रस्त्यावर कोकण रेल्‍वेच्या वीज सबस्टेशन नजीक एक पांढऱ्या रंगाची मोटार (एमएच ०७ ए ८४२९) उभी आढळली. पोलिसांना संशय आल्याने मोटारीची तपासणी केली असता तब्‍बल ४३ दारुचे बॉक्स आढळून आले. सर्व बॉक्‍समध्ये गोवा बनावटीच्या विविध कंपन्यांची दारूच्या बाटल्‍या होत्या. या सर्वांची किंमत ३ लाख ५४ हजार ४०० रूपये आहे. पोलिसांनी सर्व मुद्देमाल जप्त केला. स्थानिक गुन्हा अन्वेषणचे पोलिस उपनिरीक्षक हनुमंत भोसले, हवालदार रामचंद्र शेळके, हवालदार राजेंद्र गोसावी यांनी ही कारवाई केली. अवैध दारू वाहतूक प्रकरणी प्रकाश सावंत याच्यावर महाराष्‍ट्र दारूबंदी अधिनियम ६५ (ई) प्रमाणे गुन्हा दाखल केला आहे. तसेच दारू वाहतूक करणारी मोटारही पोलिसांनी जप्त केली आहे. या घटनेचा अधिक तपास पोलिस उपनिरीक्षक ज्ञानेश्‍वर सावंत करत आहेत.