N85247

कोत्रेवाडीतील ग्रामस्थांचा
न्यायासाठी लढा सुरूच
कचरा प्रकल्पाला विरोध; पाचव्या दिवशीही उपोषण सुरूच
लांजा, ता. १८ ः कोत्रेवाडी येथील प्रस्तावित कचरा प्रकल्पाविरोधात ग्रामस्थांनी सुरू केलेले उपोषण पाचव्या दिवशीही सुरू आहे. जोपर्यंत न्याय मिळत नाही तोपर्यंत लढा चालूच ठेवण्याचा निर्धार ग्रामस्थांनी केला आहे.
कोत्रेवाडी येथे लांजा नगरपंचायतीच्या वतीने डम्पिंग ग्राऊंड प्रस्तावित आहे. वाडीवस्तीलगत असून, जवळ जलस्रोत आहेत, तरीही नियम पायदळी तुडवून प्रकल्प प्रस्तावित करण्यात आला आहे. या विरोधात कोत्रेवाडी ग्रामस्थ १४ ऑगस्टपासून उपोषणाला बसले आहेत. उपोषणाचा सोमवारी पाचवा दिवस आहे, तरीही शासनाकडून कोत्रेवाडी ग्रामस्थांना अपेक्षित उत्तर मिळत नसल्याने ग्रामस्थांतून तीव्र संताप व्यक्त केला जात आहे. नगरपंचायत प्रशासन जर कोत्रेवाडी येथील जागेवरच डम्पिंग ग्राऊंड करण्यासाठी आग्रही असेल, तर आम्हीदेखील मागे हटणार नाही. जोपर्यंत न्याय मिळत नाही तोपर्यंत शांततेच्या मार्गाने आम्ही आमचे उपोषण चालूच ठेवणार असून, आम्ही कोणत्याही परिस्थितीत मागे हटणार नाही, असा इशारा ग्रामस्थांनी दिला आहे .