-rat२२p३६.jpg-
२५N८६३९८
रत्नागिरी : अमृत संस्थेच्या कोकणातील पहिल्या मेळाव्याला झालेली गर्दी.
-----
खुल्या प्रवर्गातील उद्योजकतेला चालना
विजय जोशी ः अमृत संस्थेचा पहिला मेळावा
सकाळ वृत्तसेवा
रत्नागिरी, ता. २२ : खुल्या प्रवर्गातील आर्थिकदृष्ट्या दुर्बल घटकांनी आपल्या पायावर उभे राहावे, त्यांच्यातूनही उद्योजक घडावेत आणि आजवर उपेक्षित राहिलेल्या या समाजघटकाची सर्वांगीण प्रगती व्हावी यासाठी ''अमृत'' ही संस्था सर्वतोपरी मदत करत आहे, असे प्रतिपादन ''अमृत'' या संस्थेचे व्यवस्थापकीय संचालक विजय जोशी यांनी केले.
महाराष्ट्र संशोधन, उन्नती व प्रशिक्षण प्रबोधिनी अर्थात् अमृत ही महाराष्ट्र शासनाची स्वायत्त संस्था असून, कोकण विभागातील पहिला अमृत मेळावा अंबर हॉल येथे झाला. त्या वेळी ते बोलत होते. १२ हजारांपेक्षा जास्त लघुउद्योजक निर्माण करून शासनाच्या महत्त्वाकांक्षी मुख्यमंत्री रोजगार निर्मिती कार्यक्रमाला हातभार लावण्याचा ''अमृत''चा मानस आहे. कुटुंबाचे वार्षिक उत्पन्न आठ लाख रुपयांपेक्षा कमी असल्याचा दाखला, अधिवास दाखला अर्थात डोमिसाईल सर्टिफिकेट, आधार, पॅन आणि शाळा सोडल्याचा दाखला एवढ्याच कागदपत्रांच्या आधारे या योजनांचा लाभ घेता येऊ शकतो.
मेळाव्याला कऱ्हाडे ब्राह्मण संघ, चित्पावन ब्राह्मण मंडळ, कुवारबाव पंचक्रोशी ब्राह्मण संघ, देवरूख ब्राह्मण संघ, पाटीदार समाज, मरूधर समाज आदींचे प्रतिनिधी जिल्हाभरातून मोठ्या संख्येने उपस्थित होते. अमित सामंत यांनी प्रास्ताविक, महेश गर्दे यांनी सूत्रसंचालन केले. अवधूत मुळ्ये यांनी आभार मानले.