86407

गणेशोत्सव बाजाराचे सावंतवाडीत नियोजन
प्रशासन सज्जः पर्यायी मार्गावर एस. टी. बससेवा, पार्किंगचीही सुविधा
सकाळ वृत्तसेवा
सावंतवाडी, ता. २२ः येथील नगरपालिका आणि पोलीस प्रशासन यांच्यावतीने गणेशोत्सव कालावधीसाठी दरवर्षी भरवण्यात येणारा माटी सामान बाजार, फळ-भाजीपाला बाजार तसेच वाहतूक नियंत्रण, पार्किंग व्यवस्था आणि मोती तलावातील गणेश विसर्जन आदींबाबत प्रभारी मुख्याधिकारी अरविंद नातू यांच्या अध्यक्षतेखाली नियोजन करण्यात आले.
येथील पालिकेत आज प्रभारी मुख्याधिकारी नातू यांच्या अध्यक्षतेखाली गणेशोत्सव कालावधीत बाजारपेठेतील नियोजनासंदर्भात पालिका व पोलीस प्रशासनातील अधिकारी-कर्मचारी यांची संयुक्त बैठक घेण्यात आली. यात वाहतूक नियंत्रणाबरोबरच बाजारपेठ तसेच मोती तलावातील गणेश विसर्जन या संदर्भात महत्त्वपूर्ण निर्णय घेण्यात आले. सद्यस्थितीत मुख्य बाजारपेठेत संत गाडगेबाबा मंडईच्या नवीन इमारतीचे काम सुरू असल्याने वाहतूक कोंडी होत आहे. त्यामुळे वाहतूक पोलिसांना वाहन चालक तसेच पादचाऱ्यांच्या रोषाला सामोरे जावे लागत आहे. यावर मात करण्यासाठी बैठकीत अचूक नियोजन करण्यात आले.
२४ ऑगस्ट ते ६ सप्टेंबर (अनंत चतुर्थी) पर्यंत बाजारपेठेच्या मार्गाने धावणाऱ्या बांदा, मळेवाड, वेंगुर्ले, शिरोडा, पणजी, दोडामार्ग या एसटी पॉम्पस हॉटेल मार्गे सोडण्यात येणार आहेत. प्रवाशांसाठी श्रीमंत बापूसाहेब महाराज पुतळा (कोर्ट) व तीन मुशी हे दोन बस थांबे ठेवले आहेत. बाजारपेठेतील रिक्षा स्टँडसाठीही पर्यायी व्यवस्था केली असून वाहतूक तळ निश्चित केले आहेत. खरेदीसाठी येणाऱ्या ग्राहकांच्या दुचाकी वाहनांसाठी कळसुलकर हायस्कूल मैदान, शांतिनिकेतन इंग्लिश स्कूल तसेच चारचाकी वाहनांसाठी राणी पार्वतीदेवी हायस्कूल मैदान, रामेश्वर प्लाझा मार्ग निश्चित केले आहेत.

चौकट
या ठिकाणी भरणार बाजार
शहरातील बाजारपेठेत माटी सामान, फळ-भाजीपाला तसेच विविध गणेश चतुर्थी सामान घेऊन बसणाऱ्या विक्रेत्यांची संख्या २५० ते ३०० च्या घरात आहे. या सर्वांना नगरपालिकेजवळील मार्ग व वेलनेस स्टोअर्स–सावंतवाडी स्टोअर्स या रस्त्याच्या दोन्ही बाजूंनी बसवले जाणार आहे. तसेच गांधी चौक परिसरातील मार्गावर गणेश चतुर्थी सामान बाजार, सावंतवाडी स्टोअर्स–जयप्रकाश चौक मार्गावर छोटे गावातील विक्रेत्यांचा बाजार या मार्गावर भरवला जाणार आहे. सोमवार (ता.२४) पासून येथील गणेशोत्सव बाजार सुरू होणार असून तो गौरी-गणपतीपर्यंत असणार आहे. या कालावधीत या मार्गावरून वाहतूक व्यवस्था पूर्णपणे बंद ठेवण्यात येणार असून प्रवेशद्वारांवर वाहतूक पोलीस ठेवणार आहेत.