95984

कारिवडे शाळेच्या प्रगतीसाठी ‘वज्रमूठ’

माजी विद्यार्थ्यांचा पुढाकार; स्नेहमेळाव्याप्रसंगी डिजिटल वर्गाचे उद्‍घाटन

सावंतवाडी, ता. १ ः शाळा म्हणजे केवळ शिक्षणाचे केंद्र नसते, ती आपल्या संस्कारांची आणि आयुष्याला दिशा देणारी पायरी असते. याचे जिवंत उदाहरण कारिवडे-गोसावीवाडी जिल्हा परिषद पूर्ण प्राथमिक शाळेत पाहायला मिळाले. या शाळेच्या माजी विद्यार्थ्यांचा स्नेहमेळावा आज उत्साहात पार पडला. जुन्या आठवणींना उजाळा देतानाच सर्व माजी विद्यार्थ्यांनी शाळेच्या सर्वांगीण विकासासाठी खांद्याला खांदा लावून उभे राहण्याचा संकल्प केला. यावेळी शाळेच्या डिजिटल वर्गाचे उद्‍घाटन सकल हिंदू-मराठा समाज जिल्हाध्यक्ष सीताराम गावडे यांच्या हस्ते करण्यात आले.
या मेळाव्याच्या अध्यक्षस्थानी सीताराम गावडे होते. प्रमुख पाहुणे रिक्षा युनियन कोकण विभागीय सचिव सुधीर पराडकर उपस्थित होते.
पराडकर यांनी गावाशी असलेले नाते अधोरेखित करत या भूमीने दिलेल्या संस्कारांचे स्मरण केले. मुख्याध्यापिका प्रगती सरमळकर यांनी शाळेच्या कार्याचा आढावा सादर केला. केंद्रप्रमुख वालावलकर यांनी विद्यार्थ्यांना भविष्यातील आव्हानांना सामोरे जाण्यासाठी मार्गदर्शन केले. सरपंच आरती माळकर, ज्येष्ठ समाजसेवक अशोक माळकर, माजी सरपंच तानाजी साईल, ग्रामपंचायत सदस्या तन्वी साईल, प्रा. भाऊसाहेब गोसावी आदी उपस्थित होते. माजी विद्यार्थी यशवंत गोसावी, अंकुश गोसावी, बाबली गोसावी, अरुण गोसावी, सिद्धेश गोसावी (ग्रामपंचायत लिपिक), नारायण गोसावी, पोस्टमास्तर पल्लवी गोसावी, ममता गोसावी, अंकिता गोसावी आदींचा गौरव झाला. कोल्हापूर स्वामी विवेकानंद कॉलेजचे माजी विभागप्रमुख प्रा. भाऊसाहेब गोसावी, माजी विद्यार्थी प्रतिनिधी दाजी गोसावी, शाळा व्यवस्थापन समिती अध्यक्ष सचिन गोसावी, पोलिसपाटील श्रुती गोसावी, मुख्याध्यापक प्रगती सरमळकर, समाजसेवक आनंद तळवणेकर आदी उपस्थित होते.