97112

वकील संघटनेतर्फे लाल फिती लावून काम

सरन्यायाधिशांवरील हल्ल्याचा निषेध, कारवाईची मागणी

सकाळ वृत्तसेवा
सिंधुदुर्गनगरी, ता. ७ ः सर्वोच्च न्यायालयाचे सरन्यायाधीश भूषण गवई यांच्यावर न्यायालयीन कामकाजाच्या वेळी वकिलाकडून बुट फेकण्याच्या झालेल्या घटनेचा सिंधुदुर्ग जिल्हा बार असोशिएशनतर्फे आज निषेध व्यक्त करण्यात आला. तसेच न्यायालयाचा व पक्षकारांचा खोळंबा होऊ नये, यासाठी लाल फिती लावून कामकाज करण्यात आले.
सर्वोच्च न्यायालयात सोमवारी (ता. ६) सरन्यायाधीश भूषण गवई यांच्या अध्यक्षतेखाली एका याचिकेवर सुनावणी सुरू असताना एका वकिलाने त्यांच्या दिशेने बुट फेकण्याच्या प्रयत्न केला. या प्रकाराबाबत सर्वत्र नाराजी व्यक्त केली जात आहे. आज सिंधुदुर्ग जिल्हा बार असोशिएशनने देखील जिल्हा न्यायालय परिसरात एकत्र येत या घटनेचा निषेध केला. यावेळी महाराष्ट्र बार असोशिएशनचे सदस्य ॲड. संग्राम देसाई, जिल्हा बार असोशिएशनचे अध्यक्ष ॲड. परिमल नाईक, ॲड. बंड्या मांडकुलकर, ॲड. यतीश खानोलकर, ॲड. शाम सावंत, ॲड. गौरी देसाई, राजेश परुळेकर यांच्यासह अनेक वकील उपस्थित होते. या घटनेचा निषेध करतानाच न्यायालयाच्या कामकाजाचा आणि पक्षकारांचा खोळंबा होऊ नये, यासाठी लाल फिती लावून आज कामकाज करण्यात आले असल्याचे ॲड. संग्राम देसाई यांनी यावेळी सांगितले.
---
‘त्या’ वकिलाची सनद रद्द करा!
सावंतवाडी ः लोकशाहीचा तिसरा मुख्य स्तंभ असलेल्या सर्वोच्च न्यायालयाचे मुख्य न्यायमूर्ती न्या. भूषण गवई यांच्यावर सोमवारी (ता. ६) न्यायालयात चप्पल फेक करणाऱ्या व्यक्तीचा तीव्र निषेध सिंधुदुर्ग जिल्ह्यातील फुले आंबेडकर चळवळीतील कार्यकर्त्यांनी केला. अशा विकृत वकिलाची सनद रद्द करून त्याच्यावर देशद्रोहाचा गुन्हा दाखल करावा, अशी मागणीही त्यांनी केली. येथील समता प्रेरणाभूमी संवर्धन समितीचे सचिव मोहन जाधव, निवृत्त बौद्ध अधिकारी कर्मचारी संस्थेचे अध्यक्ष सूर्यकांत कदम, सचिव मिलिंद सरपे यांच्यासह अनेकांनी या घटनेचा तीव्र निषेध व्यक्त केला आहे. याच निवेदनात लडाखचे पर्यावरणवादी कार्यकर्ते तथा गांधीवादी नेते सोनम वांगचुक यांना शासनाने बेकायदेशीररित्या केलेल्या अटकेचाही निषेध त्यांनी केला.