97148

वडिलोपार्जित घर एकाच्याच
नावावर केल्यामुळे उपोषण

नागवेतील प्रकरण, जि.प. समोर ठिय्या

सकाळ वृत्तसेवा
सिंधुदुर्गनगरी, ता. ७ ः वडिलोपार्जित घर नावावर करताना नागवे ग्रामपंचायतीने कोणतीही चौकशी अथवा खातरजमा न करता एकाच व्यक्तीच्या नावे करून इतर सहहिस्सेदारांवर अन्याय केल्याचा आरोप करत याप्रकरणी सखोल चौकशी करून दोषींवर कारवाई करावी, या मागणीसाठी नागवे येथील प्रीतम जयप्रकाश मोर्ये यांनी जिल्हा परिषदेसमोर आजपासून बेमुदत उपोषण सुरू केले आहे.
कणकवली तालुक्यातील नागवे ग्रामपंचायत हद्दीत मोर्ये कुटुंबीयांचे वडिलोपार्जित घर आहे. ही मालमत्ता ही वडिलोपार्जित असतानाही नागवे ग्रामपंचायतीकडून मिळालेल्या माहितीनुसार हे घर एकाच व्यक्तीच्या नावे केले आहे. हे घर वडिलोपार्जित असूनही ते एकाच हिस्सेदाराच्या नावे करणारा ठराव ग्रामपंचायतीने मंजूर केला. यावेळी ग्रामसेवक यांनी काही टिपण्ण्या केल्या होत्या. मात्र, सदस्यांचे संख्याबळ असल्याने ठराव मंजूर झाला. असे असले तरी ग्रामपंचायतीने १४ वर्षे प्रलंबित असलेला प्रस्ताव कोणत्या निकषात मंजूर केला, याची चौकशी होणे गरजेचे आहे. याबाबत योग्य चौकशी करून संबंधित दोषींवर योग्य कारवाई करावी, अशी मागणी मोर्ये यांची असून, यासाठी त्यांनी आजपासून जिल्हा परिषदेसमोर बेमुदत उपोषण सुरू केले आहे. याबाबत त्यांनी जिल्हा परिषद मुख्य कार्यकारी अधिकारी यांचेही निवेदनाद्वारे लक्ष वेधले आहे.