मटका जुगार खेळणाऱ्या
चौघांवर मालवणात गुन्हा

सकाळ वृत्तसेवा
मालवण, ता. ७ : शहरातील वायरी गर्देरोड येथे स्थानिक गुन्हे अन्वेषण शाखेच्या पथकाने मटका जुगारावर धाड टाकत चौघांवर कारवाई केली. या कारवाईत संशयितांकडून रोख रक्कम आणि मटका जुगाराचे साहित्य, असा एकूण १७ हजार २४० रुपयांचा मुद्देमाल जप्त केला. सोमवारी (ता. ६) सायंकाळी ही कारवाई झाली.
शहरातील वायरी गर्देरोड येथे मटका जुगार खेळला जात असल्याची माहिती मिळताच स्थानिक गुन्हे अन्वेषण शाखेच्या पथकाने धाड टाकत दिनार रमेश मिठबावकर (वय ५०, रा. वायरी गर्देरोड), सुधीर आडिवरेकर (रा. सावंतवाडी), नजीर मेमन (रा. सावंतवाडी), वैभव वाडकर (रा. कांबळेवीर, ता. कुडाळ) या चौघांवर कारवाई केली. पोलिस अधीक्षक मोहन दहिकर, अप्पर पोलिस अधीक्षक नयोमी साटम यांच्या सूचनेनुसार, पोलिस निरीक्षक प्रवीण कोल्हे यांच्या मार्गदर्शनाखाली पोलिस हवालदार विल्सन डिसोझा, आशिष जामदार यांनी ही कारवाई केली. याप्रकरणी मालवण पोलिस ठाण्यात संबंधितांविरुद्ध गुन्हा दाखल केला आहे.