दिग्गजांचा हिरमोड; पुन्हा ‘महिलाराज’

सावंतवाडी पंचायत समिती; सभापतीपदी कोणाची वर्णी?

सकाळ वृत्तसेवा
सावंतवाडी, ता. ७ ः येथील पंचायत समिती सभापतीपदाचे आरक्षण जाहीर झाले आहे. सभापतीपद महिला अनुसूचित जाती प्रवर्गासाठी आरक्षित झाले आहे. त्यामुळे सावंतवाडी पंचायत समितीवर पुन्हा एकदा ‘महिलाराज’ पाहायला मिळणार आहे; मात्र या स्पर्धेतून मागे पडलेल्या दिग्गजांचा हिरमोड झाला आहे. सावंतवाडीच्या २४ व्या सभापतीपदी कोणाची वर्णी लागणार? याकडे सर्वांचे लक्ष लागून राहिले आहे.
जिल्हाधिकारी कार्यालयात जिल्हाधिकारी तृप्ती धोडमिसे यांच्या उपस्थितीत ही आरक्षण सोडत काढण्यात आली. मागील कार्यकाळातही सभापतीपद महिलांकडेच होते. त्यावेळी मानसी धुरी आणि निकिता सावंत यांनी सभापती म्हणून यशस्वीपणे काम पाहिले. आता ‘अनुसूचित जाती महिलां’साठी जागा राखीव झाल्याने, या प्रवर्गातून कोणत्या महिलेला सभापतीपदाची संधी मिळते, हे पाहणे महत्त्वाचे ठरणार आहे. या पार्श्वभूमीवर, महायुती आणि महाविकास आघाडी या दोन्ही राजकीय गटांकडून योग्य उमेदवाराची चाचपणी सुरू होणार आहे. यावेळचा सभापती २४ वा सभापती ठरणार असून, नवव्यांदा महिला उमेदवाराला संधी मिळणार आहे.
---
अनेक इच्छुकांचे पत्ते कट
पंचायत समिती सभापतीचे आरक्षणही महिला वर्गाकडे गेल्याने सभापतीपदावर डोळा ठेवून इच्छुक असलेल्या अनेकांचे पत्ते कट झाले आहेत. शिंदे शिवसेना, भाजप व महाविकास आघाडीकडून अनेकांकडून सभापतीपदावर दावा करण्यात येत होता. निवडणुकीच्या पार्श्वभूमीवर तशा प्रकारची मोर्चेबांधणीही सुरू होती; मात्र महिला आरक्षण पडल्याने त्यात अनुसूचित जातीसाठी ही जागा राखीव झाल्याने सर्वांचीच निराशा झाली आहे. एकूणच सभापतीपदाच्या उमेदवारीसाठी आता योग्य महिला उमेदवार निवडण्यासाठी सर्वच पक्षांची दमछाक होणार आहे.