98721

सावंतवाडीतील रस्ते होणार खड्डेमुक्त

पालिकेकडून काम सुरू; वाहनचालकांमधून समाधान

सकाळ वृत्तसेवा
सावंतवाडी, ता. १५ ः शहरातील रस्त्यावरील खड्डे आणि त्यामुळे नागरिकांचा वाहन चालकांना होणारा त्रास लक्षात घेता पालिका प्रशासनाने हॉट मिक्सिंगद्वारे बुजवण्याचे काम आजपासून हाती घेतले आहे. टप्प्याटप्प्याने शहरातील सर्वच खड्डे बुजवण्यात येणार असल्याचे प्रशासनाने सांगितले.
शहरात यावर्षी पावसाळ्याच्या सुरुवातीलाच रस्ते खड्डेमय पाहायला मिळाले. जसा पाऊस लांबत गेला तस तसे हे खड्डे मोठ्या प्रमाणात शहरात पाहायला मिळाले. काही ठिकाणी मोठ्या प्रमाणात खड्ड्यांचे साम्राज्य असल्याने त्या ठिकाणावरून वाहन चालवताना चालकांना कसरत करावी लागत होती. प्रांताधिकारी कार्यालयासमोरील रस्ता, तर अक्षरशः खड्ड्यात हरवला होता. एकूणच या परिस्थितीबाबत नागरिकांतून तसेच सामाजिक कार्यकर्त्यातून तीव्र नाराजी व्यक्त केली जात होती.
पालिका प्रशासनाकडून या खड्ड्यांबाबत वेळोवेळी होणारे दुर्लक्ष, वाहनचालक तसेच पादचाऱ्यांना होणारा त्रास लक्षात घेता तब्बल दोन वेळा शहरातील खड्डे सामाजिक बांधिलकी प्रतिष्ठानच्या माध्यमातून बुजवले होते. नागरिकांतून त्यांच्या या कार्याबद्दल समाधानही व्यक्त केले होते. तसेच पालिका प्रशासनाच्या दुर्लक्षाबाबत तीव्र नाराजी व्यक्त केली जात होती. प्रशासनाकडून मुसळधार पावसामुळे हे खड्डे बुजवता येत नसल्याचे कारण समोर केले जात होते. पावसाळ्यानंतर हे खड्डे बुजवून रस्ते पूर्ववत करण्याचेही त्यांच्याकडून सांगण्यात येत होते.
----
पावसाने उसंत घेतल्याने काम
अखेर गेल्या काही दिवसांपासून पावसाने उंसत घेतली आहे. हीच संधी साधून पालिका प्रशासनाने शहरातील खड्डे हॉट मिक्सिंगद्वारे बुजवण्याचे काम हाती घेतले आहे. शहरातील पर्यटन सुविधा केंद्र ते पालिका समोरील रस्त्यावरील खड्डे बुजवण्याचे काम आजपासून सुरू केले आहे. शहरातील विविध भागांतीलही खड्डे प्रशासनाकडून टप्प्याटप्प्याने बुजवण्यात येणार आहेत. एकूणच खड्डे बुजवण्याचे काम हाती घेतल्याने वाहनचालक तसेच नागरिकांतून समाधान व्यक्त करण्यात आले.